Birlashgan Millatlar Tashkilotining (BMT) Gaagadagi Xalqaro sudi 33 ta davlatga Ukrainaning Rossiyaga qarshi genotsid konvensiyasi bo‘yicha da’vosiga qo‘shilishga ruxsat berdi. Bu haqda “RIA Novosti” xabar berdi.

2022-yil 26-fevralda Rossiya “maxsus harbiy operatsiyasi” boshlanganidan keyin Ukraina Xalqaro sudga Rossiyaga qarshi da’vo arizasi bilan murojaat qildi. Jarayon genotsid jinoyatining oldini olish va jazolash to‘g‘risidagi 1948-yilgi konvensiyaga tegishli.

Rossiya tashqi ishlar vaziri Sergey Lavrov da’voning “buzuq mantiq”qa asoslangani va kollektiv G‘arb xalqaro adolat me’yorlarini “suiiste’mol qilayotganini” aytgan.

“BMT asosiy sud organi bo‘lmish Xalqaro sud genotsid jinoyatining oldini olish va jazolash to‘g‘risidagi konvensiyaga muvofiq genotsid ayblovlari bilan bog‘liq bo‘lgan ishga aralashish to‘g‘risida 33 ta davlatning arizalarini qabul qilish to‘g‘risida qaror chiqardi”, — deyiladi xabarda.

Ma’lum qilinishicha, sudga 30 dan ortiq davlat ariza topshirgan, jumladan, Avstraliya, Avstriya, Belgiya, Bolgariya, Kanada, Kipr, Daniya, Niderlandiya, Estoniya, Fransiya, Germaniya, Gretsiya, Italiya, Latviya, Litva, Malta, Yangi Zelandiya, Norvegiya, Polsha, Ispaniya, Shvetsiya va Buyuk Britaniya.