Малта июнь ойида ўтказилган халқаро анжуманда Фаластин мустақиллигини расман тан олишни режалаштирмоқда. Шунингдек, Франция ҳам шунга ўхшаш қарор қабул қилиши мумкин. Бу ҳақда Times of Maltа ва Axios нашрлари маълум қилмоқда.
Малта бош вазири Роберт Абела ўз мамлакати Фаластин мустақиллигини тан олишга тайёрланаётганини билдирди. Унинг айтишича, расмий баёнот 20 июнь куни Саудия Арабистони ва Франция томонидан БМТ кўмагида ташкил этиладиган халқаро анжуманда эълон қилинади.
Моста шаҳрида ўтказилган сиёсий тадбирда сўзга чиққан Роберт Абела Фаластинни тан олиш бўйича қадам айнан мазкур анжуманда қўйилишига ишора қилган. Нашр маълумотларига кўра, учрашув мақсади икки давлат тузиш тўғрисидаги қарорни илгари суриш бўлади.
Малта аллақачон Фаластин элчисини қабул қилган. Ўтган йилнинг апрель ойида Валетта БМТ Хавфсизлик кенгашида Фаластинга ташкилотга тўла ҳуқуқли аъзолик бериш учун овоз берган эди. Бироқ шу пайтгача Малта Фаластин давлатини расман тан олмаганди.
Малта ҳукумати бўлажак анжуманда фақат ўзлари эмас, бошқа давлатлар ҳам Фаластинни тан олишини маълум қилмоқда.
Axios ахборот агентлиги хабарига кўра, июнь ойида Франция ҳам шундай қарор қабул қилиши мумкин. Президент Эммануэл Макрон апрель ойида France 5 телеканалига берган интервьюсида Фаластинни тан олиш яқин ойлар ичида ҳал қилинадиган масала эканлигини таъкидлаган эди.
2024 йилда Норвегия, Ирландия, Испания, Словения ва Арманистон Фаластин мустақиллигини тан олганини эълон қилган.
Изоҳ (0)