Rossiyaning dengiz orqali neft eksporti rekord darajaga yetdi
O‘tgan haftada Rossiyadan dengiz orqali neft eksporti hajmi yana rekord darajaga yetdi. Bu haqda “RBK” xabar berdi.
Ma’lumotlarga ko‘ra, dengiz orqali neft tashish hajmining o‘sishi neft quvurlari orqali Yevropaga eksport hajmining pasayishi bilan deyarli to‘liq qoplandi.
3-fevral holatiga ko‘ra, dengiz orqali neft yetkazib berishning sutkalik hajmi 125 ming barrelga oshib, 3,456 million barrelga yetdi. Shu bilan birga, yanvar oyida Germaniya va Polshaga quvurlar orqali neft yetkazib berish hajmi kuniga 120 ming barrelgacha qisqardi.
O‘tgan yozda ushbu yo‘nalish orqali sutkalik neft yetkazib berish kuniga 510 ming barrelga yetgan.
Tankerlarda tashiladigan Rossiya neftining asosiy xaridorlari Xitoy, Hindiston va Turkiyaga aylandi. Haligacha manzili noma’lum bo‘lgan tankerlardagi neft hajmi hisobga olinsa (agentlik ularning ko‘p qismi ushbu mamlakatlarga ketishini taxmin qilmoqda), bu hududlarda yetkazib berish hajmi kuniga 3,29 million barrelga yetdi.
Ta’kidlanishicha, bu 2022-yil boshidan beri rekord ko‘rsatkichdir. Yetkazib berish hajmi “Drujba” quvuri orqali Yevropaga neft yetkazib berishning kamayishi bilan parallel ravishda o‘sdi.
Bolgariya Yevropada dengiz orqali o‘tadigan Rossiya neftining yagona oluvchisi — kuniga taxminan 125 ming barrel. Bolgariya Yevropa Ittifoqi tomonidan Rossiya xomashyosini yetkazib berish embargosidan ozod qilingan yagona Yevropa davlati edi.
Ta’kidlanishicha, Rossiya nefti bo‘lgan ko‘p sonli tankerlar uchun yakuniy manzil ko‘rsatilmagan. Ulardan ba’zilari oraliq nuqtalarni ko‘rsatadi — Seuta, Gibraltar, Malta.
Dengiz orqali neft yetkazib berish hajmining o‘sishiga qaramay, uning eksportidan Rossiya budjeti daromadlari kamayib bormoqda. Bu tashqi bozorlarda Rossiyaning Urals neftiga chegirma bilan bog‘liq.
Mamlakat moliya vazirligining 1-fevral kuni xabar berishicha, 2023-yil yanvarida Urals neftining o‘rtacha narxi bir barrel uchun 49,48 dollarni tashkil qilgan, bu o‘tgan yilning yanvar oyiga nisbatan 1,7 baravarga kam (barrel uchun 85,64 dollar).
5-fevralda Rossiya neft mahsulotlarini yetkazib berishga Yevropa embargosi kuchga kirdi. Ikki oy oldin, 2022-yil 5-dekabrda Rossiyaning Yevropa Ittifoqiga neft yetkazib berishga embargosi kuchga kirdi.
Shu bilan birga, Yevropa Ittifoqi va G7 mamlakatlari (AQSH, Kanada, Buyuk Britaniya, Fransiya, Germaniya, Italiya va Yaponiya) uchinchi davlatlarga yetkazib berilayotgan Rossiya neftining bir barreliga 60 dollardan narx chegarasini belgiladi.
