O‘zbekiston terma jamoasi himoyachi Rustam Ashurmatov Eronning “Istiqlol” klubini tark etishi mumkin. Football nashrining xabariga ko‘ra, u tehronliklarning Turkiyadagi mavsumoldi yig‘inida jiddiy jarohat olgan.
Ashurmatov Qatardagi tibbiyot markazida tekshiruvdan o‘tish uchun Doha shahriga yo‘l olgan. Himoyachi u yerda to‘liq tibbiy ko‘rikdan o‘tishi kutilmoqda. Agar unda oldingi jarohati bilan bog‘liq muammo paydo bo‘lgan bo‘lsa, Ashurmatov butun mavsumni o‘tkazib yuborishi mumkin. Bu esa “Istiqlol” uchun jiddiy yo‘qotish bo‘ladi.
Klub bosh murabbiyi Rikardu Sa Pinto rahbariyatga Ashurmatov bilan shartnomani bekor qilishni tavsiya qilgan. Uning fikricha, futbolchining jarohati jamoa o‘yiniga sezilarli darajada salbiy ta’sir ko‘rsatadi. Shu bois portugaliyalik mutaxassis himoya chizig‘ini kuchaytirish uchun yangi futbolchi olib kelishni rejalashtirmoqda.
Agar Ashurmatov kamida uch-to‘rt oyga safdan chiqsa, “Istiqlol” Eron chempionatining birinchi davrasi yarmiga qadar uning xizmatidan foydalana olmaydi. Shu sababli klub rahbariyati ham futbolchi bilan tuzilgan shartnomani bekor qilish masalasini jiddiy ko‘rib chiqmoqda.
Ma’lumot o‘rnida, Rustam Ashurmatov yaqinda “Istiqlol” bilan ikki yillik shartnoma imzolagan edi. Tehron klubi futbolchi uchun Rossiyaning “Rubin” jamoasiga 450 ming yevro to‘lagan.
Izoh (0)