Apple 2025-moliyaviy yilning uchinchi choragi uchun moliyaviy hisobotini e’lon qildi va bu daromad hamda foyda bo‘yicha tahlilchilar kutganidan ham yuqori bo‘ldi. Bu haqda MacRumors portali xabar bermoqda.
Apple rahbari Tim Kukning aytishicha, chorak “kutilganidan ham yaxshiroq” yakunlangan. Kompaniya daromadi yillik hisobda 10 foizga o‘sib, 90 milliard dollarga yetgan, bir aksiyaga to‘g‘ri keladigan foyda esa 12 foizga ko‘paygan.
Shu bilan birga, iPhone savdosi 13 foizga o‘sib, 44,6 milliard dollarga, Mac esa 15 foizga (8 milliard dollar) ko‘tarilgan. Xizmatlar, jumladan obunalar, bulutli yechimlar va App Store’dan keladigan daromadlar 13 foizga oshib, 27,4 milliard dollarga yetgan.
Biroq iPad toifasida 6,6 milliard dollarga (-8 foiz), shuningdek, taqiladigan qurilmalar va aksessuarlar bo‘yicha 7,4 milliard dollarga (-9 foiz) pasayish kuzatilgan.
Chorakning eng muhim voqealaridan biri kompaniyaning yangi yutuqqa erishishi — uch milliard dona iPhone sotilishi bo‘ldi. Tim Kuk bu natijani iPhone 16 ga bo‘lgan yuqori talab bilan izohlagan. Uning so‘zlariga ko‘ra, bu model sotuvlar dinamikasi bo‘yicha oldingi modeldan sezilarli darajada ustun kelgan.
Bundan tashqari, Apple rahbariyati Siri ovozli yordamchisini yanada takomillashtirish rejalari haqida ma’lumot berdi. Kuk yordamchini chuqur shaxsiylashtirish va sun’iy intellektga asoslangan kengaytirilgan funksiyalarni joriy etishga qaratilgan loyihaga “sezilarli darajada ko‘proq mablag‘ yo‘naltirilganini” tasdiqladi.
Sentyabr oyida Apple o‘zining an’anaviy taqdimotini o‘tkazadi va unda iPhone 17 taqdim etiladi.
Bundan avval Apple IT mutaxassislari qancha maosh olishi ma’lum qilingandi
Izoh (0)