Niderlandiyalik ravvin Edvard van Vulen Isroilning G‘azo sektoridagi xatti-harakatlari barcha yahudiy qadriyatlariga zid ekanligini aytdi. U Isroil bosh vaziri Binyamin Netanyaxuga u yerdagi zo‘ravonlikni to‘xtatishga chaqiruvchi petitsiyani imzolagan, deb xabar berdi Volkskrant gazetasi.
“Yahudiy xalqi Isroil payg‘ambarlari davridan beri axloqiy ovoz bo‘lib kelgan yahudiylikning asoslariga tahdid soladigan jiddiy axloqiy inqirozga duch keldi. Biz bu haqda jim tura olmaymiz”, deyiladi Netanyaxuni G‘azodagi zo‘ravonlikka chek qo‘yishga chaqiruvchi “Butun dunyodan ravvinlar maktublari” nomli petitsiyada.
Petitsiyani 1200 dan ortiq kishi imzolagan. Ulardan biri ravvin Edvard van Vulen, Amsterdamdagi Yahudiy tarixi muzeyining sobiq kuratori, Niderlandiyadagi yahudiylar va nasroniylar maslahat kengashi (OJEC) hammuassisidir.
“G‘azo dahshatli ahvolda, bu menga 1939-1945-yillarda yahudiylar qanday dahshatli ahvolda bo‘lganini eslatadi. Agar o‘shanda bunday kadrlar butun dunyo bo‘ylab efirga uzatilganida, garchi bu imkonsiz bo‘lsa-da, Xolokostning oldini olish mumkin bo‘lardi”, deydi van Vulen.
Ravvin Isroilda ko‘p marta bo‘lganini va “dahshatli narsalarni” ko‘rganini bildirgan. Uning so‘zlariga ko‘ra, Isroil tomonidan bosib olingan hududlarda aholi teng huquqlarga ega emas.
“Men isroilliklarning barcha yahudiy qadriyatlariga zid xatti-harakatlar qilayotganini ko‘ryapman. Yahudiylarning Muqaddas kitobida aytilishicha, barcha odamlar Xudoning surati va o‘xshashligida yaratilgan, shuning uchun hamma tengdir. Ular insoniy qadr-qimmatning barcha shakllariga haqlidirlar.
Yana bir buyuk amrimiz - yaqinlaringizni sevish... Bundan tashqari, Muqaddas kitobdagi payg‘ambarlar har doim adolatsizlikka qarshi chiqishgan. Va bu qadriyatlar G‘azo, G‘arbiy Qirg‘oq, Janubiy Livan va Suriyada isroilliklar tomonidan sharmandalarcha toptalmoqda”, dedi ravvin.
Van Vulenning so‘zlariga ko‘ra, petitsiyadagi norozilik ko‘plab yahudiylar kurashayotgan narsa — ta’qiblar, kamsitishlar va quvg‘inlarni aks ettiradi.
Bundan avval Isroilning “Betselem” va “Inson huquqlari uchun shifokorlar” tashkilotlari alohida bayonotlar bilan chiqib, mamlakat hukumatini falastinliklarni qirg‘in qilishda ayblagandi.
Izoh (0)