Kanada 1-iyulga qadar Yevropaning qayta qurollanish dasturiga qo‘shilishni rejalashtirmoqda. Bu haqda mamlakat bosh vaziri Mark Karni ma’lum qildi.
Ma’lum qilinishicha, gap “Tayyorgarlik-2030” qayta qurollanish dasturi haqida ketmoqda. Vazir mudofaa sohasida Kanadaning AQSHga qaramligini tanqid qilgan.
Mudofaa sohasidagi kapital xarajatlarga sarflangan har bir dollarning 75 senti AQSHga ketmoqda. Bu mantiqan to‘g‘ri emas, degan Mark Karni.
Hozirda Kanada Yevropa Ittifoqi bilan mudofaa dasturida ishtirok etish bo‘yicha muzokaralar olib bormoqda. “Tayyorgarlik-2030” rejasiga ko‘ra, Yevropa Ittifoqi davlatlari kelgusi besh yil ichida mudofaaga 1,25 trillion dollar sarflashi ko‘zda tutilgan.
Biz katta yutuqlarga erishmoqdamiz va Kanada kunigacha (1-iyulgacha) aniq bir natijani ko‘rishni istardik, dedi vazir.
Prezident Donald Tramp AQSHning yangi shtati bo‘lish evaziga Kanadaga “Oltin gumbaz” raketaga qarshi mudofaa tizimiga bepul qo‘shilishni taklif qilmoqda.
“Oltin gumbaz” tizimimizga qo‘shilishni juda istaydigan Kanadaga shunday dedim: agar ular alohida, ammo teng huquqsiz davlat bo‘lib qolsa, bu ularga 61 mlrd dollarga tushadi. Biroq bizning sevimli 51-shtatimizga aylanishsa, bu ularga 0 dollarga tushadi, degan Tramp.
Hozirda Kanada mudofaa uchun mamlakat yalpi ichki mahsulotining 1,37 foizini sarflamoqda. Bu Yevropa Ittifoqi davlatlari o‘n yildan ko‘proq vaqt oldin kelishgan 2 foizlik maqsadli ko‘rsatkichdan ancha kam. Mark Karnining ta’kidlashicha, mudofaa xarajatlarining oshishi muqarrar, ammo Kanadaga maksimal foyda keltiradigan tarzda amalga oshiriladi.
Izoh (0)