Fransiyaning “PSJ” klubi UEFA Chempionlar Ligasi finalida erishgan yirik g‘alabasi evaziga 25 million yevro mukofot puli qo‘lga kiritdi. Parijliklar turnirdagi umumiy ishtiroki uchun esa jami 146 million yevro daromad oldi.
Turnir davomida klublar o‘z natijalariga qarab UEFA tomonidan belgilangan mukofot pullarini qo‘lga kiritishdi. Mukofotlar quyidagicha taqsimlangan:
• guruh bosqichidagi har bir g‘alaba uchun — 2,1 million yevro
• har bir durang uchun — 700 ming yevro
• 1/8 finalga chiqish — 12,5 million yevro
• chorak final — 15 million yevro
• yarim final — 18,5 million yevro
• finaldagi g‘alaba — 25 million yevro
Bundan tashqari, klublar UEFA tomonidan ajratiladigan marketing daromadlari va translyatsiya huquqlaridan ham foyda ko‘radi.
Finalda “PSJ”ga 5:0 hisobida yirik mag‘lubiyatga uchragan “Inter” esa turnirdagi ishtiroki uchun jami 136,6 million yevro ishlab topdi. Ushbu summaga finalga chiqqani uchun olingan 15 million yevro va oldingi bosqichlardagi barcha mukofot pullari kiradi.
“Arsenal” YCHL ortidan eng ko‘p daromad qilgan 3-jamoaga aylandi. Londonliklar turnirdagi ishtiroki evaziga 117 million yevro qo‘lga kiritgan.
Shuningdek, “PSJ” UEFA Superkubogi doirasida Londonda bo‘lib o‘tadigan bahsda ishtirok etadi va bu o‘yin uchun yana 4 million yevro mukofot puli oladi.
Eslatib o‘tamiz, Chempionlar Ligasi finali kecha, 31-may kuni Myunxen shahridagi “Allianz Arena” stadionida bo‘lib o‘tdi. Unda “PSJ” “Inter”ni 5:0 hisobida mag‘lub etdi. Bu Parij klubi tarixidagi ilk Chempionlar Ligasi kubogi hisoblanadi.
Izoh (0)