Joriy yilning 27-may kuni Toshkentda “BMT-ayollar” tuzilmasining O‘zbekistondagi vakolatxonasining tantanali ochilish marosimi bo‘lib o‘tdi.
Marosimda O‘zbekiston Respublikasi Oliy Majlisi va Hukumati aʼzolari, BMT agentliklari, xalqaro tashkilotlar rahbarlari, shuningdek, fuqarolik jamiyati va xususiy sektor vakillari ishtirok etdi.
Taʼkidlash joizki, “BMT-ayollar” tuzilmasi ofisini Toshkentda ochish bo‘yicha oliy darajadagi kelishuvga BMT Bosh kotibi o‘rinbosari, “BMT-ayollar” tuzilmasi ijrochi direktori Sima Baxusning O‘zbekistonga 2024-yil may oyida amalga oshirgan tashrifi mobaynida erishilgan edi.
Oliy Majlis Senati Raisi Tanzila Narbayeva “BMT-ayollar” bilan hamkorlikning yangi bosqichini qo‘llab-quvvatlashini bildirib, ofisning ochilishi mamlakatning gender tenglik sohasidagi taraqqiyotini xalqaro miqyosda eʼtirof etish ramzi sifatidagi muhimligini taʼkidladi.
"BMT–Ayollar tuzilmasining Sharqiy Yevropa va Markaziy Osiyo bo‘yicha mintaqaviy ofisi direktori o‘rinbosari Eliza Fernandes Sayens xonim bilan mazmunli va samarali uchrashuv o‘tkazdik.
Uchrashuvda Prezidentimiz Shavkat Mirziyoyev hamda BMT Bosh kotibining o‘rinbosari, UN Women ijrochi direktori Sima Sami Bahusning qo‘llab-quvvatlashi bilan bugun o‘z faoliyatini boshlagan UN Women vakolatxonasi O‘zbekistonda xotin-qizlar huquqlarini taʼminlash yo‘nalishida olib borilayotgan keng ko‘lamli islohotlarning xalqaro darajada eʼtirof etilayotganidan dalolat ekani alohida taʼkidlandi.
Suhbat chog‘ida Eliza xonim global miqyosdagi siyosiy va iqtisodiy beqarorlik sharoitida O‘zbekistonda xotin-qizlarning davlat boshqaruvi, fan, texnologiyalar, madaniyat va boshqa sohalardagi faolligini taʼminlash borasida erishilayotgan yutuqlarni yuqori baholadi.
Uchrashuv yakunida har bir ayol va qizning salohiyatini ro‘yobga chiqarishga xizmat qiladigan raqamli texnologiyalar va taʼlim dasturlarini ilgari surish, shuningdek, ushbu yo‘nalishdagi hamkorlikni yanada mustahkamlash va yangi qo‘shma tashabbuslarni amalga oshirish bo‘yicha kelishuvga erishildi", dedi Tanzila Narbayeva.
Ofisning ochilishi O‘zbekiston Iqtisodiyot va moliya vazirligi bilan hamkorlikda amalga oshirilayotgan Yevropa Ittifoqi tomonidan moliyalashtirilayotgan genderga yo‘naltirilgan byudjetlashtirish loyihasining ishga tushirilishi bilan bir vaqtga to‘g‘ri keldi. Ushbu loyiha yangi ofis faoliyatining birinchi keng ko‘lamli yo‘nalishi bo‘ladi.
Marosimda “BMT-ayollar” tashkilotining Yevropa va Markaziy Osiyo mamlakatlari bo‘yicha mintaqaviy direktori o‘rinbosari Eliza Fernandes Sayens ofisning mamlakat ayollari va qizlari uchun sheriklik, taraqqiyot va umid timsoli sifatidagi ahamiyatini taʼkidladi.
“Tenglikka erishish yo‘li ushbu ofisning ochilishi bilan tugamaydi - u yangidan, ko‘proq majburiyat, yangi umid va to‘xtovsiz oldinga intilish bilan boshlanadi”, - dedi Eliza Fernandes Sayens.
BMTning O‘zbekistondagi doimiy koordinatori Sabina Maxl ofisning ochilishi mamlakatning inson salohiyatini rivojlantirish va gender tenglikka qatʼiy sodiqligini tasdiqlashi, “BMT-ayollar” bilan hamkorlik esa ushbu vazifalarni amalga oshirishga xizmat qilishini taʼkidladi.
O‘zbekistonda “BMT-ayollar” tuzilmasi ofisining ochilishi xotin-qizlar huquqlari va gender tenglikni ilgari surishda yangi davrni boshlab beradi, bu tashkilotning yubileylari hamda butun dunyoda xotin-qizlar huquqlarini himoya qilish va kengaytirishga qaratilgan asosiy xalqaro hujjatlar yilida ayniqsa muhimdir. Joriy yilda tashkilot o‘zining 15 yilligini, Pekin deklaratsiyasi va Harakatlar platformasining 30 yilligi hamda BMT Xavfsizlik Kengashining Xotin-qizlar, tinchlik va xavfsizlik masalalari bo‘yicha 1325-rezolyutsiyasining 25 yilligini nishonlaydi.
Izoh (0)