Migratsiya agentligi O‘zbekiston fuqarolarini xorijdan qaytarishda firibgarlik kuzatilayotganidan ogohlantirdi.
Qayd etilishicha, xorijda ishlab yurgan va vafot etgan fuqarolarning jasadlarini O‘zbekistonga olib kelish uchun blogerlar, turli shaxslar plastik karta raqamlarini chiqarib, pul yig‘ish aksiyalari o‘tkazayotgani kuzatilmoqda.
Ayrim holatlarda eski yoki noto‘g‘ri ma’lumotlar asosida odamlarning his-tuyg‘ularidan foydalanib, firibgarlik qiluvchi shaxslar ko‘paymoqda. Ularning tarqatayotgan ma’lumotlari orqali fuqarolar aldanib, plastik kartalarga pul o‘tkazib bermoqda.
“Bu kabi xabarlarni ko‘rsangiz, hech qanday pul o‘tkazmang. Bu vaziyatda qonuniy va ishonchli yo‘l — O‘zbekiston Vazirlar Mahkamasi huzuridagi Migratsiya agentligiga murojaat qilishdir”, deya ogohlantirdi agentlik matbuot xizmatri.
Migratsiya agentligi agar O‘zbekiston fuqarosi xorijda vafot etgan bo‘lsa, Migratsiya jamg‘armasi mablag‘lari hisobiga mamlakatga olib kelinishini eslatib o‘tdi.
2024-yilda xorijdan 483 nafar o‘zbekistonlikning jasadi vatanga olib kelingan. Jasadlarni olib kelish xarajatlari, qaysi davlatdan ekanligiga qarab, turlicha hisoblanadi. Misol uchun, Rossiyadan bitta jasadni olib kelishga 1000 dollargacha, Angliyadan 4−5 ming dollargacha, Yaponiya, Koreyadan esa 9 ming dollargacha mablag‘ ketadi.
O‘zbekistonda 2025-yil 1-sentyabrdan boshlab Migratsiya agentligi tomonidan xorijiy davlatning qonunchilik hujjatlarini buzishi natijasida deportatsiya qilingan, shuningdek, O‘zbekistonning xalqaro nufuziga va obro‘-e’tiboriga salbiy ta’sir ko‘rsatuvchi xatti-harakatlarni sodir etgan fuqarolarga doir ma’lumotlar Migratsiya jarayonlariga doir ma’lumotlarning yagona elektron bazasi orqali yuritiladi. Deportatsiya qilingan fuqaro Migratsiya jamg‘armasi hisobidan qaytarilganda, qaytarish xarajatlarni ushbu fuqarodan undirib olinadi.
Izoh (0)