Buyuk Britaniya va Hindiston 3 yillik muzokaralardan so‘ng savdo bitimi imzoladi. Endilikda ingliz firmalarining Hindistonga viski, avtomobillar va boshqa mahsulotlarni eksport qilishi osonlashadi. Hind kiyim-kechak va poyabzal eksporti uchun soliqlar kamayadi. Bu haqda BBC xabar berdi.
Britaniya hukumati bu kelishuvga immigratsiya siyosati, jumladan, qirollikda tahsil olayotgan hindistonlik talabalarga nisbatan o‘zgarish kiritilmaganini aytdi. Britaniya bosh vaziri Keyr Starmerga ko‘ra, kelishuv iqtisodiyotga turtki berib, Britaniya xalqi va biznesga foyda keltiradi.
2024-yili ikki mamlakat o‘rtasidagi tovar ayirboshlash hajmi 42,6 milliard funt sterlingni tashkil etgan. Yangi bitim 2040-yilga kelib bu savdoni yiliga qo‘shimcha 25,5 milliard funt sterlingga oshirishi kutilmoqda.
Hindiston bosh vaziri Narendra Modi kelishuv o‘zaro manfaatli bo‘lganini aytdi. U bu shartnoma ikkala iqtisodiyotda savdo, investitsiya, o‘sish, ish o‘rinlari yaratish va innovatsiyalarni rag‘batlantirishga yordam berishini ta’kidlagan.
Qonunning kuchga kirishi bir yilga cho‘zilishi mumkin. Hindistondan Britaniyaga eksport qilinadigan tovarlar tarifi ancha pasayadi. Jumladan, quyidagi mahsulotlar uchun boj narxi o‘zgaradi:
- Kiyim-kechak va poyabzal;
- Avtomobil;
- Oziq-ovqat mahsulotlari, shu jumladan muzlatilgan qisqichbaqa;
- Zargarlik buyumlari va javohirlar.
Buyuk Britaniya quyidagi mahsulotlar eksportida kamroq boj to‘laydi:
- jin va viski;
- aerokosmik, elektrotexnika va tibbiy buyumlar;
- kosmetika;
- qo‘y go‘shti, losos, shokolad va pechenyelar;
- yuqori qiymatli avtomobillar.
Britaniya hukumatining ta’kidlashicha, ushbu kelishuv mamlakat 2020-yilda Yevropa Ittifoqidan chiqqanidan beri imzolagan eng yirik va iqtisodiy jihatdan eng muhim ikki tomonlama savdo kelishuvi bo‘ldi.
Ilgari muzokaralarda asosiy muammo bo‘lgan jin va viskiga tariflar ikki baravarga — 75 foizgacha, keyingi yillarda esa yana pasaytiriladi. Hindistonga eksport qilinadigan Britaniyaning qimmat avtomobillariga atigi 10 foizlik boj o‘rnatiladi. Ilgari bu 100 foizni tashkil etgan. Bitim shartlariga ko‘ra, ba’zi hind va ingliz ishchilar sug‘urta to‘lovlaridan uch yil ozod qilinadi.
Izoh (0)