COVID-vaksina 6 oylik bolalarda sinovdan o‘tkaziladi, Qozog‘iston aholisining 60 foizi emlandi. Koronaxabarlar

Butun dunyoda koronavirusga chalinganlar soni 224 700 982 kishini tashkil qilmoqda. Jons Hopkins universiteti ma’lumotlariga qaraganda, 4 631 626 kishi virus oqibatida vafot etgan. Shuningdek, 3,5 milliarddan ortiq dozada koronavirusga qarshi vaksinalar qo‘llanilgan.

Kasallanganlar soni bo‘yicha AQSh (40,9 million), Hindiston (33,2 million), Braziliya (20,9 million), Rossiya (7 million) va Fransiya (6,9 million) eng oldinda bormoqda.

Finlyandiyaning Tampere universiteti Vaksinalarni o‘rganish markazi koronavirusga qarshi vaksinani sinovdan o‘tkazish uchun 6 oylikdan 12 yoshgacha bo‘lgan bolalarni tanlab olmoqda. Loyiha Pfizer kompaniyasi tomonidan ishlab chiqilgan. Tadqiqot, shuningdek, Ispaniya, Polsha va AQShda ham o‘tkaziladi.

“Tadqiqotda qatnashish uchun 12 yoshgacha bo‘lgan sog‘lom bolalar tanlab olinadi, ularda immunitetni pasaytiruvchi kasalliklar, bolalar va o‘smirlardagi multitizimli shamollash sindromi yoki vaksinalarga allergiyali reaksiya bo‘lmasligi kerak”, — deyiladi markaz xabarida.

Tadqiqotdan keyin dorining qo‘llanilishi Yevropa dori vositalari agentligi tomonidan ma’qullanishi kerak. Shundan so‘ng aholining ushbu guruhini emlashga kelasi yil boshida kirishilishi mumkin. 12 yosh va undan katta o‘smirlarni emlash esa Finlyandiyada avgustda boshlangan.

Qozog‘istonda voyaga yetgan aholining qariyb 60 foizi to‘liq vaksina oldi. Mamlakat SSV ma’lumotlariga ko‘ra, 13-sentabr holatiga koronavirusning birinchi komponenti bilan 7 million, ikkinchi komponenti bilan — 5,9 milliondan ortiq kishi emlangan.

Birinchi dozani olganlar soni aholining emlanadigan qismining 71,1 foizini tashkil qilmoqda. Ikkinchi dozani esa 59,2 foizi olishga ulgurgan.

Qozog‘iston karantin choralarini yumshatmoqda. 13-sentabrdan boshlab yuzma-yuz uchrashuvlarga, dam olish kunlari jamoat transporti ishlashiga, milliy terma jamoalari va klub jamoalari mashg‘ulotlariga ruxsat berildi. Bundan tashqari, butun mamlakat bo‘ylab masjidlar hovlilarida juma namozlarini o‘qish mumkin bo‘ldi.

Ayni vaqtda, emlanmagan fuqarolar avvalgidek, dam olish kunlari savdo-ko‘ngilochar markazlarga kiritilmaydi. So‘nggi bir kecha-kunduzda mamlakatda 3959 kishida koronavirus aniqlangan.

Angliya hukumati mamlakatda tungi klublarga va katta tadbirlarga kirish huquqini beruvchi vaksinatsiya pasportlarini joriy qilishdan voz kechdi.

“Biz vaksinatsiya pasportini faqat pasport olish uchungina kiritishimiz kerak emas. Ushbu rejalar bekor qilinishini e’lon qilishdan xursandman”, — dedi Buyuk Britaniya sog‘liqni saqlash vaziri Sajida Javida.

Vaksinatsiya pasportlarini joriy qilish rejasi oy oxirida kuchga kirishi kerak edi. Klublar yoki ommaviy tadbirlarga kirish uchun COVID-19 ga qarshi emlanganlikni tasdiqlovchi hujjat, koronavirusga nisbatan manfiy natijali test yoki musbat PZR-testdan keyin o‘z-o‘zini yakkalash muddati tugaganligini tasdiqlovchi ma’lumotnomani ko‘rsatish kerak bo‘lishi taxmin qilingandi.

Hukumatdagilar aytishicha, bunday pasportlarni joriy qilish imkoniyati zaxiradagi variant sifatida qoladi. Ayni paytda Shotlandiyada vaksinatsiya pasportlari 1-oktabrdan kiritiladi.

Buyuk Britaniyada butun pandemiya davrida 7,19 million kishi koronavirusga chalingan. Britaniyaliklarning 48,39 million nafari vaksinaning birinchi dozasini olgan.

Gruziyada to‘rt haftalik tanaffusdan keyin 13-sentabrdan jamoat transporti qayta ish boshladi. COVID-19 bilan kasallanish darajasi o‘sib ketishi tufayli, jamoat transporti 14-sentabrda to‘xtatib qo‘yilgan edi. Dastlab tanaffus 4-sentabrgacha rejalashtirilgan edi.

Gruziya SSV ma’lumotlariga qaraganda, avgustning ikkinchi yarmida kasallanish holatlari soni bir kunda 5000—6000 atrofida bo‘lgan. O‘tgan hafta ushbu ko‘rsatkich uch barobar pasaygan, o‘tgan bir kecha-kunduzda esa mamlakatda 946 kishida virus aniqlangan. COVID-19 oqibatidagi o‘lim darajasi mamlakatda yuqori bo‘lib qolmoqda, o‘tgan bir sutkada 48 bemor vafot etgan.

Pandemiya boshidan buyon mamlakatda 581 815 kishi kasallanib, shularning 8233 nafari vafot etgan.