O‘zbekiston tashqi ishlar vaziri Abdulaziz Komilov 24-sentabr, seshanba kuni Nyu-Yorkda Hindiston tashqi ishlar vaziri Subrahmanyam Jaishankar bilan uchrashdi, deya xabar bermoqda TIV matbuot xizmati.
Xabar berishlaricha, ikki mamlakat tashqi siyosat idoralari rahbarlari siyosat, savdo-iqtisodiy, investitsiya, madaniy-gumanitar va boshqa sohalardagi hamkorlikning ustuvor masalalari bo‘yicha fikr almashgan.
O‘zbekiston va Hindiston yetakchilarining muntazam muloqoti natijasida ikki tomonlama munosabatlarda kuzatilayotgan yangicha shiddat mamnuniyat bilan qayd etilgan.
Suhbatda tovarlar va xizmatlarni o‘zaro yetkazib berish nomenklaturasini kengaytirish, savdo aylanmasi hajmlarini oshirish, qo‘shma investitsiya loyihalarini amalga oshirishga urg‘u bergan holda hamkorlikning iqtisodiy bloki masalalariga alohida e’tibor qaratilgan.
Turli darajadagi bo‘lajak O‘zbekiston—Hindiston uchrashuvlarining jadvali va kun tartibi ko‘rib chiqildi. “Uchrashuvda xalqaro tashkilotlar doirasidagi hamkorlik hamda xalqaro va mintaqaviy xavfsizlikni ta’minlash sohasidagi sherikchilik masalalari ham muhokama qilindi”, — deyiladi TIV axborotida.
Izoh (0)