Буюк Британия ва Ҳиндистон 3 йиллик музокаралардан сўнг савдо битими имзолади. Эндиликда инглиз фирмаларининг Ҳиндистонга виски, автомобиллар ва бошқа маҳсулотларни экспорт қилиши осонлашади. Ҳинд кийим-кечак ва пойабзал экспорти учун солиқлар камаяди. Бу ҳақда BBC хабар берди.
Британия ҳукумати бу келишувга иммиграция сиёсати, жумладан, қиролликда таҳсил олаётган ҳиндистонлик талабаларга нисбатан ўзгариш киритилмаганини айтди. Британия бош вазири Кейр Стармерга кўра, келишув иқтисодиётга туртки бериб, Британия халқи ва бизнесга фойда келтиради.
2024 йили икки мамлакат ўртасидаги товар айирбошлаш ҳажми 42,6 миллиард фунт стерлингни ташкил этган. Янги битим 2040 йилга келиб бу савдони йилига қўшимча 25,5 миллиард фунт стерлингга ошириши кутилмоқда.
Ҳиндистон бош вазири Нарендра Моди келишув ўзаро манфаатли бўлганини айтди. У бу шартнома иккала иқтисодиётда савдо, инвестиция, ўсиш, иш ўринлари яратиш ва инновацияларни рағбатлантиришга ёрдам беришини таъкидлаган.
Қонуннинг кучга кириши бир йилга чўзилиши мумкин. Ҳиндистондан Британияга экспорт қилинадиган товарлар тарифи анча пасаяди. Жумладан, қуйидаги маҳсулотлар учун бож нархи ўзгаради:
- Кийим-кечак ва пойабзал;
- Автомобиль;
- Озиқ-овқат маҳсулотлари, шу жумладан музлатилган қисқичбақа;
- Заргарлик буюмлари ва жавоҳирлар.
Буюк Британия қуйидаги маҳсулотлар экспортида камроқ бож тўлайди:
- жин ва виски;
- аэрокосмик, электротехника ва тиббий буюмлар;
- косметика;
- қўй гўшти, лосос, шоколад ва печеньелар;
- юқори қийматли автомобиллар.
Британия ҳукуматининг таъкидлашича, ушбу келишув мамлакат 2020 йилда Европа Иттифоқидан чиққанидан бери имзолаган энг йирик ва иқтисодий жиҳатдан энг муҳим икки томонлама савдо келишуви бўлди.
Илгари музокараларда асосий муаммо бўлган жин ва вискига тарифлар икки бараварга — 75 фоизгача, кейинги йилларда эса яна пасайтирилади. Ҳиндистонга экспорт қилинадиган Британиянинг қиммат автомобилларига атиги 10 фоизлик бож ўрнатилади. Илгари бу 100 фоизни ташкил этган. Битим шартларига кўра, баъзи ҳинд ва инглиз ишчилар суғурта тўловларидан уч йил озод қилинади.
Изоҳ (0)