Pfizer va AstraZeneca vaksinalari koronavirusning “hindcha” shtammiga qarshi samarali bo‘lib chiqdi

Angliya Jamoatchilik sog‘lig‘ini saqlash xizmati ekspertlari tomonidan olib borilgan tadqiqotlar guvohlik berishicha, Amerikaning Pfizer/BioNTech hamda Britaniyaning AstraZeneca vaksinalari COVID-19’ning “hindcha” shtammiga qarshi yetarlicha samaralidir, deb yozadi “Interfaks”.

Xizmat tomonidan e’lon qilingan tadqiqot natijalari ko‘rsatishicha, ikkita doza bilan emlangandan keyin ikki hafta o‘tib, Pfizer’ning “hindcha” shtammga qarshi samaradorligi 88 foizga, AstraZeneca’niki esa 60 foizga yetadi.

“Men shu narsaga tobora ishonchim komil bo‘lib bormoqdaki, biz ‘yo‘l xaritasi’ni amalga oshirish yo‘lida turibmiz, chunki bu ma’lumotlar vaksina ikkita dozadan keyin (‘hindcha’ variantga qarshi) samarali ishlashini ko‘rsatdi”, — dedi shu munosabat bilan Buyuk Britaniya sog‘liqni saqlash vaziri Mett Henkok.

Uning fikricha, bu novatorlik ma’lumotlari bo‘lib, u kelasi oyda hukumat belgilangan “yo‘l xaritasi”ga muvofiq ko‘proq COVID-cheklovlarni bekor qila olishiga umid qilmoqda. Hukumat rejalariga ko‘ra, koronavirus bo‘yicha cheklovlarning qolganlarini bekor qilish 21-iyundan boshlanishi kerak.

Mart oxirida Hindistonda koronavirusning qo‘sh mutatsiyali yangi turi aniqlandi, u B.1.617 sifatida ham taniqli. Bu variant 2020-yil boshida Xitoyning Uxan provinsiyasida birinchi marta aniqlangan “oddiy” SARS-CoV-2 koronavirusidan ko‘ra yuqumliroqdir. Undan avval koronavirusning “britancha” va “braziliyacha” variantlari haqida ham ma’lum bo‘lgan, ular ham yuqumlilik bo‘yicha “uxancha” koronavirusdan farq qilgandi.