АҚШ президенти Дональд Трамп сунъий интеллект имкониятлари уни бир оз хавотирга солаётганини билдирди, шунингдек, миллиардер Илон Маск ҳеч қачон ундан бирор нарса талаб қилмаганини таъкидлаган. Бу ҳақда у Newsmах телеканалига берган интервьюсида маълум қилган.
“Бу (сунъий интеллект) бир оз ваҳимага солади. Бу инқилоб ва пули бор ҳар бир киши сунъий интеллект соҳасида иштирок этмоқда. Уларнинг барчаси СИга киришни хоҳлайди. Унинг нималарга қодир эканлигини кўрсангиз, ҳайратланарли. Бу ҳақиқатан ҳам жуда ажойиб, лекин бир оз қўрқинчли”, дейди Трамп.
Шунингдек, у Маскни АҚШ фаровонлиги учун меҳнат қилаётган ватанпарвар деб билишини айтган.
“Аммо у мендан ҳеч қачон бирор нарса сўрамаган. Бунга унинг тўла ҳаққи бор, деб ўйлайман. Бироқ бу мен буни бажараман дегани эмас, эҳтимол бажармасман, лекин у мендан ҳеч қачон нимадир талаб қилмаган”, дея изоҳ берган АҚШ президенти.
“Масалан, мен яқинда электромобиллардан фойдаланиш талабини бекор қилдим. У эса ҳеч қачон олдимга келиб: "Менга бир яхшилик қила оласизми? Буни қилманг”, демаган. Биласизми, у ҳалол одам ва у буни мамлакат манфаати учун қиляпти. Биз юзлаб миллиард долларлик фирибгарликларни фош этмоқдамиз”, деб тушунтирган Трамп.
Изоҳ (0)