Президент Шавкат Мирзиёев Мьянмада рўй берган кучли зилзила оқибатида кўплаб инсонлар ҳалок бўлгани ва жабрлангани, жиддий талафотлар кўрилгани муносабати билан Мьянма Иттифоқи Республикаси Давлат бошқаруви кенгаши раиси Генерал Мин Аунг Ҳлаингга ҳамдардлик мактуби йўллади. Бу ҳақда Ўзбекистоннинг Бангкокдаги Бош консулхонаси хабар берди.
Давлат раҳбари ушбу оғир ва мусибатли дамларда қурбон бўлганларнинг оила аъзолари ва барча яқинларига, Мьянма халқига чуқур таъзия ва ҳамдардлик изҳор этди.
Зилзила оқибатлари
28 март куни Мьянмада юз берган зилзила қурбонлари мингдан ортди. 7,7 магнитудали зилзила усиз ҳам фуқаролар уруши домида қолган мамлакатда кўприклар, аэропортлар ва бошқа инфратузилмага жиддий зарар етказди.
Сейсмологларга кўра, бу 1946 йилдан бери мамлакатда содир бўлган энг кучли зилзила ҳисобланади. Унинг эпицентри Мьянманинг иккинчи йирик шаҳри Мандалай ғарбида бўлган. Силкиниш тўлқинлари пойтахт Нейпидо ва бошқа йирик шаҳарларда ҳам сезилган.
Мьянма ва Таиландда юз берган кучли зилзила оқибатида жабрланганлар орасида Ўзбекистон фуқаролари аниқланмагани ҳақида хабар берилганди.
Изоҳ (0)