Ўзбекистондаги мавжуд маъмурий судларда вилоят, туман ва шаҳар ҳокимлари томонидан имзоланган қарорларнинг 933 таси қонунга зид бўлгани боис бекор қилинган. Бу ҳақда Олий суд ахборот хизмати хабар берди.
Қайд этилишича, 2024 йилда маъмурий судлар томонидан оммавий-ҳуқуқий муносабатлардан келиб чиқадиган 15 373 та иш кўриб чиқилган. Натижада 6338 нафар фуқаро ва юридик шахс ҳуқуқлари тикланган.
Ҳисобот даврида маъмурий ва фуқаролар ўзини ўзи бошқариш органларининг, мансабдор шахсларнинг қарорлари устидан шикоят қилиш тўғрисидаги 6 991 та иш кўриб чиқилди. Хусусан, ҳоким қарорини ҳақиқий эмас деб топиш билан боғлиқ кўриб тамомланган ишлар сони 2 720 тани ташкил қилиб, шундан жисмоний ва юридик шахсларнинг 933 та аризаси қаноатлантирилган, дейилади ташкилот ахборот хизмати берган маълумотда.
Олий суд ахборот хизмати раҳбари Азиз Абидовнинг “Дарё”га қўшимча қилишича, қарорлари бекор бўлган ҳокимлар рейтингида Тошкент вилояти, Самарқанд ҳамда Жиззах вилоятлари пешқадам ҳисобланади.
Бу қарорлар вилоят ҳокимлари томонидан имзоланган бўлмаслиги мумкин, балки шаҳар ва туман ҳокимларининг қароридир. Қолаверса, бу рақамлар шу ҳудудда ҳокимлар ёмон ишлаяпти деган хулосага келишга сабаб бўлмаслиги керак. Бу ҳудуднинг катталиги ва мурожаатлар сонининг кўплиги билан ҳам боғлиқ, дейди Абидов.
Аниқлаштирилишича, 2024 йилда Тошкент вилоятида фаолият юритувчи шаҳар ва туман ҳокимларининг 143 та, Самарқанд вилоятидаги ҳокимларнинг 128 та ҳамда Жиззахдаги раҳбарларнинг 113 та қарорлари бекор қилинган.
Изоҳ (0)