Ўзбекистон Судьялар Олий кенгаши Ғузор тумани ҳокими Саъдулла Бобоқуловни ёлғончиликда айблади. Таъкидланишича, ҳоким фуқаролик ишлари бўйича Ғузор туманлараро суди раиси Саттор Ақановнинг ўзини тутишидан норози бўлиб, Судьялар Олий кенгашига мурожаат қилмаган.
Интернетда кўплаб муҳокамаларга сабаб бўлган мулоқот ўзини Ғузор тумани ҳокими ёрдамчиси Ҳасан дея таништирган шахснинг Фуқаролик ишлари бўйича Ғузор туманлараро судининг раиси Саттор Ақановга қўнғироқ қилиб, ҳоким сўраётганини айтиши билан бошланади.
Телефон гўшагини олган ҳоким суд раисининг салом бермаганига эътибор қаратиб, «Ёшингиз кичик, салом берсангиз бўлади-ку?!», дейди. Суд раиси эса «процессда эканини» айтар экан, ҳокимдан нима учун қўнғироқ қилаётганини сўрайди.
Шунда ҳоким: «Ҳозир гаплашишга вақтингиз йўқми, қачон вақтингиз бўлади?», деб сўраган. Судья ҳокимга қабулига келиши мумкинлигини айтган. Бунга жавобан ҳоким судья унинг қабулига келиши лозимлигини таъкидлаган. Суд раиси: «Қабулингизга бормайман, кечириб қўясиз», — деб жавоб берган.
Мавзуга доир: «Ҳокимлар қарғага ўхшаб қолдик, ким кўрса ҳайдаяпти». Ғузор ҳокими судья билан мулоқотини изоҳлади
Ҳоким Бобоқуловнинг сўзларига Судьялар Олий кенгаши муносабат билдирди. Унда таъкидланишича, Ўзбекистонда судьялар халқ депутатлари Кенгашлари мажлисларида ҳисобот бермайди.
Судьялар халқ депутатлари Кенгашлари мажлисларида ҳисобот бермайди. Аксинча, «Маҳаллий давлат ҳокимияти тўғрисида»ги қонуннинг 24-моддасига кўра, халқ депутатлари вилоят, туман ва шаҳар Кенгашлари мажлисида бир йилда камида бир марта фуқаролар ҳуқуқлари ва эркинликлари, шунингдек, корхоналар, муассасалар ва ташкилотларнинг ҳуқуқлари ҳамда қонун билан қўриқланадиган манфаатларини суд йўли билан ҳимоя қилишни амалга оширишга доир фаолияти тўғрисида ахборот беради.Айни пайтда Судьялар Олий кенгаши томонидан ижтимоий тармоқларда тарқалган аудиоёзув ва Ғузор тумани ҳокими Саъдулла Бобоқуловнинг мақолада келтирган важлари юзасидан, шу жумладан, ҳоким томонидан суд ишларини ҳал этишга аралашиш, судьяга нисбатан қонунга хилоф равишда таъсир (босим) ўтказиш ҳолатларига йўл қўйилганлигини аниқлаш юзасидан текширув бошланган. Текширув натижалари маълум қилинади.
Шу ўринда эслатиб ўтамиз, Президентимизнинг Ўзбекистон Республикаси Конституцияси қабул қилинганининг 27 йиллигига бағишланган тантанали маросимдаги маърузасида судларнинг чинакам мустақиллигини таъминлаш биз учун энг устувор вазифа эканлиги, айниқса, суд бирон-бир мансабдор шахснинг қўли етадиган идорага айланиб қолишига мутлақо йўл қўймаслик шартлиги, шу сабабли суд ишларига аралашгани ёки судга босим ўтказгани учун жавобгарликни кучайтириш лозимлиги ҳақида таъкидлаб ўтган.
Судьялар Олий кенгашининг оммавий ахборот воситалари билан алоқалар шўъбаси
Изоҳ (0)