Sulton tex group ишини кўра бошлаган Қашқадарё вилоят Маъмурий суди журналистга диктофондан фойдаланишни тақиқлади

Қарши тумани ҳокими Мақсуда Мустафоева ҳамда гувоҳномаси бекор қилинган «Сильвер фибер агро кооперацияси» МЧЖ масъулларининг апеллация шикояти ва Қарши туман прокуратураси протести асосида Қарши туман Маъмурий судининг 2020 йил 8 июндаги қарорини кўриб чиқишни бошлаган вилоят Маъмурий суди очиқ суд мажлисида «Дарё» мухбирига диктофондан фойдаланишни тақиқлади.

Судья журналистга суд ишида фақатгина фотоаппаратдан фойланишга рухсат бераётганини таъкидлар экан, суд жараёнида овоз ёзилишига Қарши туман ҳокимлиги ҳуқуқшуноси қаршилигини, шу боис суд мажлисида журналистнинг овоз ёзиб олишига рухсат беролмаслигини маълум қилди.

«Суд жараёни тасвирга олинмоқда, керак бўлса шу видеони олишингиз мумкин. Бироқ видеони фақатгина Олий суд рухсати билан берамиз», — деди суд ҳайъати.

Судда сўз олган Қарши туман ҳокимлиги ҳуқуқшуноси Йўлчи Равшанов ҳамда гувоҳномаси бекор қилинган «Сильвер фибер агро кооперацияси» вакили Қарши туман Маъмурий суди адолатсиз қарор чиқарганини айтиб, суд қароридан норозилигини баён қилди.

Кластер вакиллари — Эшқобил Пардаев ҳамда Дилмурод Менглиев эса воқеалар ривожи ҳақида батафсил гапириб, суднинг адолатли қароридан умидворлигини айтди.

Судда сўз олган Sulton tex group хусусий корхонаси ҳуқуқшуноси Эшқобил Пардаев гувоҳномаси тугатилган «Сильвер фибер агро кооперацияси» вакилидан суд қароридан норози томоннинг кооперация бўлиш учун ўтган вақт давомида қандай иш қилгани билан қизиқди.

Саволга жавоб беришни истамаган вакил аввалига бу ташкилот сири эканлигини айтди. Аммо суд талабига кўра жавоб берар экан, улар ҳеч қандай кооперация эмаслигини, МЧЖ ташкилот эканлигини, аммо тез орада кооперация тузиш ниятида юрганини маълум қилди.

Таъкидлаш лозим, дастлабки суд мажлисида сўз олган копперация аталмиш МЧЖ таъсисчиси Нурбек Мўминов ҳам ташкилоти оддий МЧЖ эканлигини, кооперация бўлолмаслигини айтганди.

«Хўш, кооперация бўлмасангиз, нега унда тумандаги 500 дан ортиқ фермерни мажбурлаб, шартнома туздингиз», — дея берилган саволга жавоб берган «Сильвер фибер агро кооперацияси» МЧЖ ҳуқуқшуноси Олтиев бунга тадбиркорлик субъекти сифатида киришилганини таъкидлади.

Суд ҳайъати ҳам «Сильвер фибер агро кооперацияси» МЧЖ фаолияти билан қизиқди.

«Келгусида пахта хом ашёсини сотиб олиш, қайта ишлаш ва тайёр маҳсулот ишлаб чиқаришни назарда тутганмиз», — деди МЧЖ ҳуқуқшуноси.

Суд давомида сўз олган кластер ишончли вакили Дилмурод Менглиев суднинг адолатига ишонишини, тез орада адолатли қарор қабул қилинишидан умидворлигини қўшимча қилди.

Суд 17 июль куни соат 16:00 гача танаффус эълон қилди.