Тошкент ҳокимининг Аҳмад Дониш ва Амир Темур кўчалари кесишмасида 65 та тадбиркорга тегишли бино ва иншоотлар жойлашган 6 гектар ер участкасини давлат ва жамият эҳтиёжи учун олиш тўғрисидаги қарори бекор қилинди, дея хабар бермоқда Олий суд.
Маълум қилинишича, Тошкент туманлараро маъмурий судида сўнгги кунларда кўпчиликнинг эътиборини тортиб келган, оммавий ахборот воситалари ва ижтимоий тармоқларида муҳокамаларга сабаб бўлган Юнусобод тумани Аҳмад Дониш ва Амир Темур кўчалари кесишмасида 65 та тадбиркорга тегишли бино ва иншоотлар жойлашган 6 гектар ер участкасини давлат ва жамият эҳтиёжи учун олиш тўғрисидаги ҳоким қарорларини ҳақиқий эмас деб топиш ҳақидаги маъмурий ишни мазмунан кўриб чиқиш бўйича суд жараёни 2021 йил 27 январь куни якунланди.
Ушбу иш судья Д.Тошев томонидан кўриб чиқилиб, суднинг ҳал қилув қарорига кўра, аризачи «Уй рўзғор моллари» МЧЖ, «Нур цехри ошиёни» МЧЖ, «Зар-зийнат бизнес» МЧЖ, «Саида-барока» ХК, «Glorius justice» МЧЖ, С. Росошанская ва «Эмисун маркет» ХКнинг талаблари тўлиқ қаноатлантирилди.
Тошкент шаҳар ҳокимининг 2018 йил 27 ноябрдаги «Ер майдонларида ободонлаштириш ва бузиш ишларини олиб бориш ҳақида»ги 1667-сонли, 2019 йил 31 декабрдаги «Urban developers» МЧЖ шаклидаги қўшма корхонасига ер майдонини ажратиб бериш ҳақидаги 1879-сонли ва Юнусобод туман ҳокимининг 2018 йил 18 декабрдаги «Тошкент шаҳар ҳокимининг 2018 йил 27 ноябрдаги қарори ижроси ҳақида»ги 2102-сонли қарорлари ҳақиқий эмас деб топилди.
Ҳал қилув қарори устидан қарор чиқарилган кундан эътиборан 30 кун ичида Тошкент шаҳар маъмурий судига шу суд орқали апелляция тартибида шикоят берилиши ёки протест келтирилиши мумкинлиги маълум қилинган.
Аввалроқ Юнусободдаги «Универсам» кўпригининг бир томони таъмирлаш ишларини тезлаштириш учун тўлиқ ёпилгани ҳақида хабар берилганди.
Изоҳ (0)