Олий суд: Суд ишига аралашган мансабдорлар ҳақида йил якунида президентга ахборот киритилади

Ўзбекистонда мансабдорларнинг суд ишига аралашув кузатилмоқда. Бу ҳақда 14 апрель куни АОКАда бўлиб ўтган матбуот анжуманида Олий суд вакиллари маълум қилди, дея хабар бермоқда «Дарё» мухбири.

Олий суд судьяси Дилмурод Каримовнинг айтишича, мансабдорлар томонидан суд ишига аралашиш ҳолатлари йўқ дейиш хато.

«Суд ишига аралашиш ҳолатлари йўқ, десак нотўғри бўлади. Ҳаёт бўлгандан кейин ҳамма манфаатига қараб ҳаракатини қилади. Лекин мансабдор суд ишига аралашгани бўйича судья юқори органларга хабар бериши кераклиги унинг ҳуқуқими ёки мажбуриятими деганда, бу мажбурияти бўлади. Яъни Судьялар Олий кенгаши, Олий судга ёки суд раисига судья хабар бериши шарт. Мени ишимга фалон одам аралашяпти, дейиши шарт. Ўзбекистондаги барча судьялар шундай мажбурияти борлигидан хабардор. Судья ишига аралашганлик учун тегишли тартибда юқори органларга маълум қилса, албатта, мансабдорга нисбатан чора кўрилади», — деди у.

Олий суд бўлим бошлиғи Шербек Назаров судлар мустақиллигига аралашганлик бўйича кўрилаётган чоралар ҳақида гапирди.

«Конституция, Судлар тўғрисидаги қонунда ҳамда Жиноят кодексида суд мустақиллигига аралашиш учун нормалар белгиланган, яъни суд мустақилдир ва у қонунга бўйсунади. Унинг фаолиятига аралашганлик жавобгарликка сабаб бўлади, деб белгиланган. Бу норма аралашув ҳолатлари кузатилгани учун ҳам пайдо бўлган. Суд мустақиллигига аралашиш бўйича бугунги кунда Судьялар олий кенгаши томонидан қатъий чоралар кўриб келинмоқда. Президент қарорига асосан, Судьялар Олий кенгаши ҳар йили судьялар мустақиллигига аралашганлик, дахл қилинганлик тўғрисида Бош прокуратурага жиноят иши қўзғатиш бўйича тақдимнома киритади. Йил якунида Ўзбекистон президентига судьялар мустақиллигига аралашилгани юзасидан ахборот киритиш механизми яратилган. Суд ишига аралашган амалдорларнинг нечтасига чора кўрилгани бўйича аниқ рақамлар йўқ. Бу бўйича ишлар ёпиқ тарзда кўрилишидан хабаримиз бор», — деди Олий суд расмийси.

Аввалроқ судлар тизимида ягона дарча тамойили жорий этилиши белгилангани хабар қилинганди. Шунингдек, суд томонидан 2022 йилнинг январь–март ойларида 543 та ҳоким қарори ҳақиқий эмас деб топилгани билдирилган.