Анқара Ироқ ва Сурия шимолидаги курдлар томонидан назорат қилинадиган ҳудудларга зарба берди, чунки бу ҳудудлардан «террорчилар Туркияга қарши ҳужумларда база сифатида фойдаланган», деб хабар қилди Туркия Мудофаа вазирлиги.
Вазирликнинг таъкидлашича, бу ҳаракатлар «Тирноқ-қилич» операцияси доирасида амалга оширилган, унда «Курдистон ишчилар партияси» (КИП), Курдистон жамоалари иттифоқи (КЖИ), курд халқининг ўзини ўзи мудофаа қилиш бўлинмаларини зарарсизлантириш мақсад қилинган.
Аввалроқ Twitter’да Туркия Мудофаа вазирлиги «ҳисоб-китоб» вақти келгани ва «ёмонлар хоинона ҳужумлари учун жавоб бериши» ҳақида хабар қолдирганди. Унга қирувчи самолётнинг парвози акс эттирилган фотосурат илова қилинган. Кейинроқ вазирлик яна бир твит жойлаштирди. «Террорчиларнинг инлари аниқ зарбалар билан йўқ қилинади», — дейилади у.
Haberturk мухбирининг хабар беришича, 19 ноябрь куни тахминан соат 21:00да (Тошкент вақти билан 23:00) Туркиянинг жануби-шарқида жойлашган Диёрбакир шаҳридаги авиабазадан самолётлар ҳавога кўтарилган, иккинчи гуруҳ парвози 20 ноябрь куни соат 1:00 атрофида амалга оширилган, бу пайтда илгари жўнаб кетган ўнта самолёт базага қайтган.
Туркия КИПни Истанбулдаги терактни уюштирганликда айбламоқда, партия Анқарада террорчи ташкилот ҳисобланади. 13 ноябрь куни шаҳарнинг машҳур пиёдалар кўчаларидан бири – Истиқлолда портлаш содир бўлган эди, оқибатда олти киши ҳалок бўлди, камида 81 киши жароҳатланди.
Ҳужумда 1999 йилда туғилган Сурия фуқароси Аҳлам Альбашир гумон қилиниб, қўлга олинди. Туркия полициясига кўра, у КИП билан алоқаси борлигини тан олган. Портлаш билан боғлиқ ҳолда жами 50 киши ҳибсга олинган.
КИП ҳужумга алоқадорлигини рад этди. Ташкилот ўз баёнотида «курдлар тинч аҳолига ҳар қандай тарзда ҳужум қилиши мумкин эмаслигини» таъкидлаган.
Изоҳ (0)