Туркиянинг Каркамиш шаҳри(Газиантеп вилояти)га Сурия шимолидан бешта ракета келиб тушди, деб хабар бермоқда CNN Turk минтақа губернатори Довут Гулга таяниб.
Ракеталар мактаб ва юк машинаси устига қулаган, уйлар ва боғлар ҳам зарар кўрган. Губернаторнинг айтишича икки киши ҳалок бўлган, олти киши жароҳатланган. Туркия ички ишлар вазири Сулаймон Сойлу уч нафар, жумладан бир бола ва бир ўқитувчи ҳалок бўлганини маълум қилди.
Haberturk хабарига кўра, ракеталар Туркияда террорчи деб тан олинган курд «Халқ ҳимояси ортрядлари» ва «Курдистон ишчилар партияси» томонидан учирилган.
Туркия президенти Ражаб Тоййиб Эрдўғон Индонезиядаги G20 саммитидан қайтгач, Сурия шимоли ва Ироқдаги курд тузилмаларига қарши «Тирноқ-қилич» операциясини ўтказишга буйруқ берганди.
20 ноябрь куни эрталаб Анқара Ироқ ва Сурия шимолидаги курдлар томонидан назорат қилинадиган ҳудудларга зарба бергани, чунки бу ҳудудлардан «террорчилар Туркияга қарши ҳужумларда база сифатида фойдаланган»и ҳақида эълон қилди. Операцияга 50 дан ортиқ самолёт ва 20 та дрон жалб қилинган.
Туркия Мудофаа вазирлиги хабарига кўра, операцияда 89 та нишон, жумладан, бошпана ва ўқ-дорилар омбори йўқ қилинган, шунингдек, «террор ташкилот етакчилари ҳам зарарсизлантирилган».
21 ноябрь куни Эрдўғон Туркиянинг Сурия ва Ироқдаги амалиёти авиазарбалар билан чекланиб қолмаслигини, Мудофаа вазирлиги ва Бош штаб қуруқликдаги қўшинларнинг қайси контингентини жалб қилиш зарурлигини кўриб чиқаётганини айтди.
Туркия курдларни Истанбулдаги терактни уюштирганликда айбламоқда. 13 ноябрь куни шаҳарнинг машҳур пиёдалар кўчаларидан бири – Истиқлолда портлаш содир бўлган эди, оқибатда олти киши ҳалок бўлди, камида 81 киши жароҳатланди.
Изоҳ (0)