Франция президенти Эммануэль Макрон Европа мамлакатларида француз ядро қуролини ташийдиган самолётларни жойлаштириш бўйича музокараларни бошлашга тайёрлигини билдирди. Бу ҳақда у TF1 телеканали эфирида маълум қилди.
Макрон АҚШ аллақачон Европа ҳудудига “ядровий соябон” жойлаштирганини қайд этди. Сиёсатчи Европа Иттифоқи мамлакатларида ядро қуролини ташийдиган самолётларни жойлаштириш шартларини ҳам айтди.
Франция бошқаларнинг хавфсизлиги учун ҳақ тўламайди. Бундан ташқари, ядровий тийиб туриш стратегияси доирасида ҳимоя қилинадиган ҳудудни кенгайтириш мақсадида, Франция ўзининг шахсий мудофааси учун зарур бўлган қуролларни бошқа давлатларга жўнатмайди. Франция ядро қуролини бошқа мамлакатларга жойлаштириш бўйича якуний қарор ҳар доим Франция президенти — олий бош қўмондон томонидан қабул қилинади, дея таъкидлади у.
Стокгольм тинчлик тадқиқотлари институти (SIPRI)нинг 2024 йилги маълумотларига кўра, Франция дунёдаги 12 100 га яқин ядро каллакларидан 290 тасига эга. Бу мамлакатни Россия, АҚШ ва Хитойдан кейин дунёдаги тўртинчи йирик ядровий давлатга айлантиради.
Франция тўртта атом сувости кемасига эга бўлиб, улардан тахминан 10 минг километр радиусга эга ядровий каллакли ракеталар учирилади. Бундан ташқари, мамлакатда Рафале қирувчи самолётларидан учирилиши мумкин бўлган ядровий каллакли 50 га яқин қанотли ракета мавжуд.
Изоҳ (0)