8 май куни Ватикандаги Сикст капелласи мўрисидан оқ тутун кўтарилди. Бу янги Рим папаси сайланганини англатади. Бу ҳақда Vatican News канали хабар бермоқда.
Авлиё Пётр собори балконида кардинал-протодиакон Доминик Мамберти янги Рим папасини эълон қилди. Унга кўра, католик черковига биринчи бор Америка қитъаси вакили раҳбарлик қилади.
Янги Рим папаси этиб Августин ордени аъзоси, 69 ёшли америка-перулик кардинал Роберт Прево сайланди. Рим-католик черкови тарихидаги биринчи америкалик понтифик Лев XIV номи билан бошқаради.
Роберт Прево Иллинойс штатининг Чикаго шаҳрида туғилган, бироқ хизматининг кўп қисмини Перуда миссионер сифатида ўтказган ва яқинда Ватикандаги вазирлик вазифасини бажарувчи дикастерияга раҳбарлик қилган. Унинг папа Франциск ислоҳотларини давом эттириши кутилмоқда.
Янги Рим папасини сайлаш бўйича конклав 7 май куни бошланди. Дастлабки босқичларда кардиналлар бир тўхтамга кела олишмаган. Улар кунига икки марта яширин овоз беришган. Номзод овозларнинг учдан икки қисми ва яна бир овозни олиши лозим эди. Шундан сўнг у Пётр тахтини эгаллашга розилигини тасдиқлади ва ўзининг папа номини танлади.
Манбаларга кўра, Рим папаси лавозимига АҚШ, Италия, Шри Ланка ва Африка мамлакатларидан олтита асосий номзод кўриб чиқилган.
Янги понтифик кардиналлар овоз бериши бошланганидан бери тўртинчи ёки бешинчи турда сайланганми, ҳозирча номаълум. Ҳар ҳолда, у конклавнинг иккинчи кунида сайланган учинчи папа бўлади.
Франциск ва Бенедикт XVI ҳам шундай тарзда сайланган эди. Улардан олдин Иоанн Павел II конклавнинг учинчи кунида танланган.
2013 йилда Франциск сайланганида ҳам, оқ тутун кўриниши билан эълон қилиниши орасидаги кутиш бир соатдан сал кўпроқ давом этган.
Рим папаси Франциск 21 апрель куни 88 ёшида вафот этди. 26 апрель куни понтифик Римдаги Санта-Мария-Мажоре черковига дафн этилди. Дафн маросимида 100 дан ортиқ хорижий делегациялар, шу жумладан, ўнлаб давлат раҳбарлари иштирок этган. Жумладан, АҚШ президенти Дональд Трамп, Украина президенти Владимир Зеленский, Франция президенти Эммануэл Макрон, Европа комиссияси раиси Урсула фон дер Ляйен, Венгрия бош вазири Виктор Орбан, шунингдек, Лотин Америкаси давлатлари раҳбарлари — Аргентина президенти Хавьер Милей ва Бразилия президенти Луис Инасиу Лула да Сильва ҳамда бошқа кўплаб юқори мартабали шахслар қатнашган.
Изоҳ (0)