Финляндия президенти Саули Ниинистё НАТОнинг ядровий тийиб туриш сиёсати ҳақида гапирар экан, ядро қуроли альянснинг тийиб туриш кучларининг ажралмас қисми эканини айтди ва уларни бирдан-бир мақсад эмас, балки профилактика воситаси деб атади.
Унинг сўзларига кўра, альянсга қўшилганидан кейин Финляндия ўз ҳудудига ядро қуроли жойлаштирмоқчи эмас ва ҳеч ким буни финляндияликларга таклиф қилмаяпти.
Ниинистё қайд этишича, ядро қуролида ғолиб чиқиб бўлмайди ва уни ҳеч қачон бошлаш керак эмас.
Бундан ташқари, Финляндия етакчиси Украинага «қанча керак бўлса, шунча вақт давомида» ёрдам беришни ваъда қилди ҳамда Франция президенти Эммануэль Макрон ва Германия канцлери Олаф Шольцнинг Москва билан мулоқотни сақлаб туриш бўйича саъй-ҳаракатларини қўллаб-қувватлади.
Швеция бош вазири Улф Кристерссон билан музокаралардан кейин Ниинистё Туркиянинг талабларига қарамасдан, Финляндия ва Швециянинг НАТОга қўшилиш эҳтимолини «жуда оптимистик» баҳолашини айтди.
Октябрь охирида Финляндиянинг Iltalehti газетаси манбаларга таяниб, мамлакатнинг НАТОга аъзо бўлиши ҳақидаги қонун лойиҳаси унинг ҳудудига ядро қуроли олиб кириш имкониятини бериши, шунингдек, ҳужжат ҳарбий базалар ташкил қилиш борасида чекловларни назарда тутмаслиги ҳақида ёзганди. Нашр маълумотларига кўра, мамлакат ташқи ишлар ва мудофаа вазирлари Пекка Хаависто ва Антти Кайкконен ёзда блок билан музокаралар чоғида Финляндия ҳеч қандай қўшимча шартлар қўймаслигини айтган.
Кейинроқ Финляндия бош вазири Санна Марин мамлакатга ядро қуроли жойлаштирилиши эҳтимолдан узоқлиги ҳақида фикр билдирган.
Ноябрь бошида Финляндия президенти Ядро қуроли масаласини муҳокама қилишдан аввал мамлакатнинг НАТОга қўшилишигача сабр қилишга чақирди ва шу билан бирга, унинг қўлланилиши — «барчамиз учун якун бўлиши»ни таъкидлади. Шунингдек, у Хелсинки блокка қўшилиш ҳақида ариза берганида ядро қуроли жойлаштирилишига нисбатан алоҳида шартлар қўймаганига аниқлик киритди.
Финляндия ва Швеция НАТОга қўшилиш учун қачон ариза берган?
18 май куни Финляндия ва Швеция Украинадаги жанговар ҳаракатлар авж олган бир пайтда НАТОга қўшилиш учун ариза берган. Туркия Хелсинки ва Стокгольмни мамлакатда тақиқланган Курдистон Ишчилар партияси билан ҳамкорликда айблаб, уларнинг альянсга қўшилишга бир муддат тўсқинлик қилди.Швеция ва Финляндия НАТО блокига қўшилиши учун альянсга аъзо бўлган 30 та мамлакатнинг барчаси тегишли битимни ратификация қилиши керак.
Швеция ва Финляндиянинг НАТОга аъзо бўлишини ратификация қилиш жараёни 5 июль куни бошланган. Уларнинг НАТОга қўшилишини альянснинг 30 та аъзосидан 28 таси ратификация қилди.
Изоҳ (0)