Хитой Касалликларни назорат қилиш ва профилактика маркази (CDC) раҳбари Гао Фу келажакда инсоният янги «Х вируси»га дуч келиши мумкинлигини айтди ва унга қарши курашга тайёргарлик кўриш учун биргаликдаги ҳаракат тамойилини таклиф қилди. Гао Фу бу ҳақда «Жамиятда фан ва технологиялар» Кёто онлайн-форуми доирасида айтиб ўтган деб ёзади «РБК».
CDC раҳбарининг сўзларига кўра, коронавирусга қарши кураш олиб бораётганига қарамай, келажакда дунё, албатта, ҳали хусусиятлари ҳеч кимга маълум бўлмаган «Х вируси» билан тўқнаш келади. Гао Фунинг таъкидлашича, бу исталган пайтда, исталган жойда содир бўлиши мумкин.
«Инсоният келажаги учун биз муаммони биргаликда ҳал қилишимиз керак. Шу муносабат билан мен «тўртта C тамойилини» таклиф қиламан: ҳамкорлик (cooperation), рақобат (competition), маълумот алмашиш (communication) ва баъзан учинчи томон билан мувофиқлаштириш (coordination)» — дея қўшимча қилди у.
Шунингдек, CДC раҳбарининг таъкидлашича, инсоният бугун нафақат коронавирус пандемиясига, балки «долзарб ва нотўғри маълумотлар қоришиб кетадиган инфодемия»га ҳам қарши курашмоқда.
2020 йилнинг март ойида Европа Иттифоқи ва Жаҳон соғлиқни сақлаш ташкилоти (ЖССТ) 25 та мамлакат раҳбарлари билан келишган ҳолда ОАВ ва ЖССТ веб-сайтида очиқ хат эълон қилганди. Хатда COVID-19 сингари пандемия ҳолатлари учун халқаро ҳамкорлик шартномасини ишлаб чиқишга чақирилган.
Мактубни имзолаганлар орасида ЖССТ бош директори Тедрос Гебрейесус, Европа Кенгаши раиси Шарл Мишел, Буюк Британия бош вазири Борис Жонсон, Германия канцлери Ангела Меркель, Франция президенти Эммануэль Макрон, Жанубий Африка Республикаси президенти Сирил Рамафоса, Жанубий Корея президенти Мун Чже Ин, Сербия президенти Александр Вучич, Украина президенти Владимир Зеленский ва бошқа бир қатор давлат раҳбарлари бор.
Мактубда айтилишича, «COVID-19 пандемияси дунё ҳамжамияти учун 1940 йиллар давридан кейинги энг жиддий муаммога айланди. Ҳалокатли икки жаҳон уруши якунида сиёсий раҳбарлар бирлашиб кўп қиррали тизим яратган эди. Унда аниқ мақсадлар қўйилган, жумладан, мамлакатлараро илиқ муносабат яратиш, яккаланиш ва миллатчилик васвасаларини бартараф этиш, тинчлик, фаровонлик, соғлиқ ва хавфсизликка оид муаммоларни ҳал қилиш каби».
«Пандемияга тайёргарлик ва уларга қарши курашиш тўғрисида янги халқаро шартнома тузишда дунё мамлакатлари биргаликда ҳаракат қилиши кераклигига шубҳамиз йўқ. Ушбу янги жамоавий мажбурият пандемияга тайёргарликнинг энг юқори сиёсий даражадаги тарихий босқичи бўлиши мумкин», — дейилади қўшма баёнотда.
Изоҳ (0)