Елисей саройи Франция президенти Эммануэл Макроннинг рафиқаси Брижитдан тарсаки егани акс этган видеонинг ҳақиқийлигини тасдиқлади. Манбаларга кўра, бу “яқинлик лаҳзаси” бўлган, дея хабар бермоқда RMC нашри.
Аслида нима бўлганди?
Воқеа якшанба куни кечқурун Франция президенти самолёти расмий ташриф билан келган Ханой аэропортига қўнганида юз берди. Самолёт эшиги эр-хотин мухбирларга кўриниш беришга тайёр бўлишидан олдинроқ очилди.
Associated Press эълон қилган тасвирларда президент самолёти эшигида аввал Макрон кўринади. Сўнгра бошқа бир шахс унга тарсаки туширади. Бундан кейин президент журналистлар олдига чиқиб, биринчи хонимга қўлини узатади, аммо у эрининг ёрдамини қабул қилмайди.
ОАВнинг бунга реакцияси
Воқеа тасвирлари бир зумда ижтимоий тармоқларда тарқалди. Daily Mail бу тасвирларни “даҳшатли” деб атаб, Макроннинг рафиқаси “унинг юзига қўл теккизганини” таъкидлади. The Telegraph нашрининг ёзишича, “Франция президенти рафиқаси уни туртиб юборганидан сўнг ҳайрон қолгандай кўринган”.
Дастлаб Елисей саройи тасвирлар ишончсиз эканлигини ва улар сунъий интеллект томонидан яратилган бўлиши мумкинлигини маълум қилди. Маъмурият вакиллари видеоларни Россияга хайрихоҳ каналлар тарқатаётганини айтди.
Бироқ 26 май куни Елисей саройи видеонинг ҳақиқийлигини тасдиқлади. Аввалига матбуот хизмати эр-хотин “шунчаки ҳазиллашганини” айтди.
Аммо кейинроқ манба бу оддий эр-хотин жанжали эканини тасдиқлаб, “бу ерда ҳеч қандай фитна назарияларини ўйлаб топиш шарт эмас”лигини таъкидлади.
Кейинчалик Макроннинг ўзи ҳам оиладаги келишмовчилик ҳақидаги миш-мишларни инкор этди.
“Хотиним билан тортишамиз, ҳазиллашамиз. Бу оддий ҳолат баъзилар томонидан глобал фалокатга айлантирилмоқда, ҳатто айримлар турли назариялар ўйлаб топишмоқда. Буларнинг барчаси бемаънилик”, деган президент.
“Бу бир неча дақиқа давом этди. Менимча, у бундан хафа бўлмади. Бу Франция имижи учун яхши, деб ўйлайман”, деган биринчи хонимнинг ўзи.
Франция президентининг Жануби-Шарқий Осиёга бир ҳафталик ташрифи бошланди. Вьетнамдан сўнг у Индонезия ва Сингапурга бормоқчи. Ушбу сафар минтақада иқтисодий ва дипломатик алоқаларни мустаҳкамлашга қаратилган.
Брижит Макрон ҳақида нималар маълум?
Брижит Макрон (қизлик фамилияси Троне) эридан 24 ёш катта. У машҳур Амьен шаҳрининг қандолатчи оиласида туғилган. Унинг аждодлари 1872 йилда бу шаҳарда ўрнашиб, шоколад маҳсулотлари ва макарон печеньесининг маҳаллий турини ишлаб чиқариш билан донг таратган. Брижит олти фарзанднинг энг кенжаси бўлиб, анча эркин тарбия топган. 21 ёшида муваффақиятли банкир Андре Луи Озер билан оила қурган ва уларнинг учта фарзанди дунёга келган.
Эммануэл Макрон хотини билан Амьендаги лицейда ўқиётган пайтида танишган. Троне унга француз тилидан дарс берарди, турмуш қурган ва уч фарзандли аёл бўлишига қарамай, улар ўртасида меҳр пайдо бўлган. Макроннинг ота-онаси ўғлининг ўқитувчиси билан алоқасини узиш мақсадида уни Парижга ўқишга юборишга қарор қилганда, у севгилисига албатта уйланишга ваъда берган. Макрон сўзида турди — улар 2007 йилда турмуш қуришди. Бугунги кунда Брижит Макрон етти набиранинг бувиси.
2024 йил октябрь ойида Франция президенти Variety журнали билан суҳбатда Брижит Макрон Netflix’нинг “Эмили Парижда” сериалининг тўртинчи мавсумида рол ижро этганини маълум қилди. Биринчи хоним у ерда эпизод, яъни ўзининг ролини ижро этган.
Эммануэл Макрон Франция тарихидаги энг ёш президент ҳисобланади: у 39 ёшида лавозимга киришган бўлиб, ҳозирда 47 ёшда. У ижтимоий тармоқларни фаол юритади, президентнинг “парда ортидаги” ҳаёти эса унинг шахсий фотосуратчиси Соазиг де ла Муассонер суратларидан маълум. У телевидениеда кўрсатилмайдиган президент ҳаётининг саҳна ортидаги ҳолатларини суратга олади. Макроннинг кўплаб норасмий суратлари ижтимоий тармоқларда кенг муҳокамага сабаб бўлмоқда ва ҳатто мемларга айланиб кетмоқда.
Изоҳ (0)