Президент Шавкат Мирзиёев Остона шаҳрида “Марказий Осиё – Италия” саммитида иштирок этди ва нутқ сўзлади. Бу ҳақда Президент матбуот хизмати хабар берди.
Ўзбекистон етакчиси ўз нутқида иқтисодиёт соҳасида сўнгги йилларда Ўзбекистон ва Италия ўртасидаги ўзаро савдо айланмаси ва инвестициялар ҳажми салкам уч баробар ўсганини таъкидлади. Италиянинг етакчи компаниялари билан биргаликда технологик кооперация лойиҳалари амалга оширилмоқда.
“Мамлакатни инновацион ривожлантиришда Италия ишбилармонлар ҳамжамиятининг анъанавий кучли позициясини инобатга олиб, савдо-саноат палаталаримиз шафелигида бизнес-мулоқот учун доимий майдон – “Марказий Осиё – Италия” ишбилармонлар клубини тузишни таклиф этаман. Тадбиркорларнинг кенг иштирокидаги бундай учрашувлар ҳар йили мамлакатларимиз пойтахтларида ўтказилиши ҳамда савдо ва инвестиция соҳасидаги ҳамкорлик учун янги имкониятлар очиши мумкин”, деди давлат раҳбари.
Ўзбекистон президенти кўп томонлама Саноат ва технологик кооперация дастури ишлаб чиқилиши ва қабул қилиниши муҳимлигини айтди.
“Бу ўринда гап технологиялар трансфери, илғор билимлар ва энг яхши амалиётларни жорий этиш, юқори технологик саноат корхоналарини яратиш учун қулай шароитларни шакллантириш ҳақида бормоқда.
Мавжуд муваффақиятли тажрибани инобатга олиб, минерал ресурслар ва қишлоқ хўжалиги хом ашёсини чуқур қайта ишлаш, электротехника, кимё, тўқимачилик, чарм-пойабзал, озиқ-овқат ва бошқа қайта ишлаш соҳалари учун замонавий асбоб-ускуналарни ишлаб чиқариш, эҳтиёт қисмлар ва саноат маҳсулотларини маҳаллийлаштириш, Италиянинг етакчи брендлари билан ҳамкорликда дизайн марказларини яратиш кооперациянинг муҳим йўналишларига айланиши мумкин”, деди Шавкат Мирзиёев.
Изоҳ (0)