Парижда намойишчи фермерлар тракторларда қишлоқ хўжалиги тўғрисидаги қонун лойиҳасини кўриб чиқиш бошланиши олдидан Франция парламентининг қуйи палатаси — Миллий ассамблея биносига етиб келишди. Бу ҳақда Le Parisien нашри хабар берди.
Маълум қилинишича, ўнлаб тракторлар парламент биносининг дарвозаси олдига тўхтаган. Уларга акцияни ташкил этаётган FNSEA ва Jeunes Agriculteurs касаба уюшмалари байроқлари ўрнатилган.
Режа бўйича, акцияга 200 га яқин киши қўшилади. Намойишчилар ёнида бир нечта полиция машинаси навбатчилик қилмоқда. Ташкилотчиларнинг айтишича, акция шаҳар префектураси билан келишилган. Бироқ тракторларга ёпиштирилган норозилик шиорлари оқ қоғоз билан беркитиб қўйилган.
“Душанба куни эрталаб Ил-де-Франснинг бир нечта йўлларида, айниқса Ивелин ва Вал-д’Уаз департаментларида ҳаракатланиш қийинлашди. Фермерлар Париж атрофидаги асосий йўлларни номаълум муддатга ёпишни режалаштирмоқда, чунки Миллий ассамблеяда қишлоқ хўжалигини тартибга солиш, жумладан, пестицидлардан фойдаланиш бўйича қонун лойиҳаси муҳокамаси бошланмоқда”, дея таъкидламоқда нашр.
Деҳқонлар қонун лойиҳасини қўллаб-қувватламоқда, аммо сўл партия депутатлари киритмоқчи бўлган кўплаб тузатишлар туфайли унинг муҳокамаси чўзилиб кетишидан хавотирда. Улар эса ўз навбатида қишлоқ хўжалиги фаолиятини тартибга солишни енгиллаштириш, масалан, фермерларга қурғоқчилик бўлган тақдирда сув омборларини тўлдиришга рухсат бериш экологияга салбий таъсир кўрсатишидан қўрқмоқда.
“Ҳеч қаерга бормаймиз. Биз 18 ойдан буён ҳукуматдан бирон-бир ўзгариш кутмоқдамиз”, деди намойишчилардан бири.
Трактордаги фермерлар мамлакат автомобиль йўлларида “шиллиққурт операциялари”ни амалга оширмоқда. Улар паст тезликда ҳаракатланиб, атайлаб транспорт ҳаракатини секинлаштирмоқда.
Ўтган ҳафта фермерлар мамлакат шимолидаги Нор ва Па-де-Кале департаментларида бир нечта автойўлни тўсиб қўйган эди. Фермерлар бюрократик тартиб-қоидаларни, уларнинг фаолиятини сертификатлаш тартибини соддалаштириши ва пестицидлардан фойдаланишни чеклашни қайта кўриб чиқиши керак бўлган қонун лойиҳасидаги чора-тадбирлардан норози.
Изоҳ (0)