Наманган вилояти Поп туманида номаълум шахс томонидан “Ўзбекистон темир йўллари” АЖ номига шикоят мурожаат эълон қилинди.
Унда Наманган вилояти Поп тумани темирйўлда ишловчи ишчилардан ҳар ой ишхонага 40 кг металлолом олиб келиш мажбурий этиб белгилангани айтилган.
“Темирйўл янги қурилган Поп-Қамчиқ-Тошкент йўналиши йўл атрофида ҳеч қандай металлолом йўқ. Ҳар ой 40 кг металлоломни қаердан оламиз? Қишда совуқда, ёзда иссиқда қийналиб ишлаб топган ойлигимиздан сотиб олишга мажбур бўлиб келмоқдамиз. Бунга бирор чора кўрадиган виждонли раҳбарлар борми? Бу ишларга чек қўйиш кимнинг қўлидан келади?”, дейилган мурожаатда.
Маълум қилинишича, шикоятда келтирилган манзил “Қўқон МТУ” филиалининг Қамчиқ темир йўл масофасига қарашли бўлиб, темир йўл устки эҳтиёт қисмларини алмаштиришдан чиққан ёки муддати ўтиб бўлган детал-жиҳозларни ҳамда қора металл парчаларини топшириш бўйича корхонага йиллик режа берилган ва бу режа ички бўлинмаларга тақсимот қилиб берилган.
Ўрнатилган тартибда ҳужжатлар расмийлаштирилиб қабул қилиш шаҳобчасига топширилади. Мазкур тадбир доирасида ҳеч қандай ишчи-ходимларга мажбурий юклама мавжуд эмас.
“Юқоридагини инобатга олган холда хулоса бу мурожаатнома ҳақиқатга деярли мос келмайди”, дейилади муносабатда.
Изоҳ (0)