Ўзбекистон ва Афғонистон темир йўллари вакиллари 8 ноябрь куни учрашув ўтказди.
“Ўзбекистон темир йўллари” АЖ раиси вазифасини бажарувчи Зуфар Назруллаев “Толибон” темир йўл бошқармаси бошлиғи Бахт ар-Раҳмон билан учрашди. Томонлар Мозори Шарифга тижорат юкларини темир йўл орқали етказиш имкониятини таъминлаш учун имкон қадар тезроқ иш бошлашга келишиб олган.
Музокараларнинг асосий мавзулари темир йўлнинг Ҳайратон—Наибобод—Мозори Шариф қисмини реконструкция қилиш билан боғлиқ бўлди. Учрашув якунлари бўйича томонлар Ҳайратон—Наибобод—Мозори Шариф участкасида “Ўзбекистон темир йўллари” АЖ мутахассислари томонидан амалга ошириладиган қурилиш ишларини эрта бошлаш бўйича келишувга эришган.
Бу ҳамкорлик Ўзбекистон ва Афғонистон ўртасидаги темир йўл алоқаларини ривожлантиришнинг янги истиқболларини очиб, савдо-иқтисодий алоқаларни мустаҳкамлашга хизмат қилмоқда.
“Томонлар темир йўл транспорти соҳасида ҳамкорлик ва ўзаро манфаатли шерикликни янада ривожлантиришга умид билдирди. Бу ҳамкорлик минтақанинг транспорт инфратузилмасини яхшилашга, Афғонистон ва Ўзбекистонда савдо-иқтисодий соҳани ривожлантириш учун қулай шарт-шароитлар яратишга ёрдам беради”, — дейилади хабарда.
Ҳайратон—Мозори Шариф темир йўли шикастлангани сабабли 2 йилдан ортиқ вақтдан бери ишламаяпти. У Трансафғон темир йўли лойиҳасининг бир қисми сифатида кўрилади.
Изоҳ (0)