Хабарингиз бор, бугун Қашқадарё вилоятининг Деҳқонобод туманида содир бўлган кўчки сабаб темир йўл ишдан чиқди. Натижада поездлар ҳаракати тўхтатилди.
Қайд этилишича, бугун соат 06:10 да Чашма-Оқработ станциялари оралиғининг 103-км 5-6 пикет қисмида тупроқ кўчкиси содир бўлган. Шу сабабли поездлар ҳаракати вақтинча тўхтатилиб, ҳолатни бартараф этиш мақсадида ҳудудга мутахассислар жалб қилинган.
Қўшимча қилинишича, мазкур воқеа 2023 йилнинг 9 февраль куни 80/79-сонли Тошкент—Термиз—Тошкент ва 682/681-сонли Қумқўрғон—Сариосиё—Қумқўрғон йўналишларидаги поездлар ҳаракатининг вақтинча тўхтатилишига сабаб бўлган.
Деҳқонободда бундай воқеа дастлаб 2019 йилнинг апрель ойида содир бўлганди.
2019 йил 6 апрель куни соат 02:08 да Деҳқонобод тумани ҳудудида юк поезди кучли жала оқибатида чўккан темир йўл участкасида тиқилиб қолди. Ҳодиса Оқработ—Деҳқонобод темир йўлининг 98-километрида содир бўлганди.
56 та вагондан (уларнинг 26 тасида юк бўлган, 30 таси бўш) темир йўл таркибини бошқариб келаётган иккита электровоз кучли ёғингарчиликлар натижасида 2,5—3 метрга чўккан 50—60 метр узунликдаги участкада тиқилиб қолган. Сўнгра манёврли электровоз ёрдамида темир йўлнинг чўккан қисмидан 56 та вагон текис сатҳга олиб чиқилган. Ўша пайтда темир йўл участкасини қайта тиклаш учун “Ўзбекистон темир йўллари”нинг иккита авария-қутқарув поезди, Қарши ҳудудий темир йўл узелининг 180 нафар ходими ва техникалари жалб қилинган.
Бундай ҳолат ўша йили 30 апрель куни соат 21:25 да Тошгузар—Бойсун—Қумқурғон темир йўлининг 103-километрида Сариосиё—Тошкент йўловчи поезди ўтаётган вақтда ҳам содир бўлган.
“Ўзбекистон темир йўллари” компаниясининг Ахборот-таҳлил медиамаркази ўша пайт ОАВ сўровига жавобан ҳодиса “Оқработ” станциясидан 8-километр масофадаги “Оқработ—Чашмаиҳофизон” участкасида содир бўлганини билдирган.
Поезд ҳаракати йўналишида ўнг томонда тупроқнинг кўчиши учта вагоннинг ҳаракатини чеклаб қўйган. Поезд бригадасининг тезкор ҳаракатлари натижасида йўловчилар бошқа вагонларга ўтқазилган ва ҳаракатини давом эттирган. Йўловчилардан ҳеч ким жароҳат олмаган. Шахсий буюмлар ва ҳужжатлар кейинроқ ўз эгаларига топширилган.
22:10 да эса барча йўловчилар “Деҳқонобод” станциясига муваффақиятли этиб борган. Ҳодиса жойида эса тўлиқ техник кўрик амалга оширилган. Йўловчиларни жойлаштириш учун иккита вагон қўшилгандан сўнг поезд белгиланган манзилга йўл олган.
Деҳқонободда кучли ёмғир сабаб нафақат темир йўл, автомобиль йўллари ўпирилиб тушиш ҳолатлари ҳам содир бўлган.
Бундай воқеа 2019 йилнинг апрель ойида Деҳқонобод туманининг “Оқработ” маҳалла фуқаролар йиғинида содир бўлган. Тоғ-адирликлардан иборат ҳудудда кучли ёмғир ёғиши натижасида ер юмшаб, асфалт қопланган йўл ўпирилиб кетган. Ўша вақтда йўлнинг мазкур қисмида машиналар ҳаракатланмагани учун ҳеч қандай техник воситалари ва одамлар жабрланмаган.
Автомобиль йўлининг ўпирилиб тушиши билан боғлиқ иккинчи ҳолат шу ҳудуддан сал нарида, аниқроғи Оқработдан Сурхондарё вилоятининг Бойсун тумани ҳудудига кирган жойда содир бўлган.
2019 йилнинг 21 апрель куни кечки пайт М39 Тошкент—Термиз автомобиль йўлининг 1320-километрида ҳам ер ўпирилиб тушган. Маълум бўлишича, асфалт йўлнинг устида “булоқча” кўз очиб, сув оқишни бошлаган. Ўша булоқнинг кўз очиши ҳудуднинг 2019 йил 21 апрель куни ўпирилиб тушишига сабаб бўлганди.
Дарвоқе, бугун Қашқадарё вилояти ҳокими Муроджон Азимов ҳам кўчки содир бўлган жойга бориб, ҳолатни ўз кўзи билан кўрган ва масъулларга ҳудуддаги носозликни тезда бартараф этиш бўйича топшириқ берган.
Изоҳ (0)