Silk Road Briefing нашри Хитой-Қирғизистон-Ўзбекистон темир йўли қурилиши қолдирилгани ҳақида хабар берганди. Қирғизистон Вазирлар Маҳкамаси раиси ўринбосари Бакит Торобоев мазкур маълумотни рад этди.
Қирғизистон ҳукумати расмий вакилига кўра, бу маълумот ҳақиқатга тўғри келмайди. У яқинда Хитойга амалий ташрифи доирасида тегишли томонлар билан лойиҳа бўйича музокаралар ўтказганини айтди.
“Темир йўл қурилиши кейинга сурилгани ҳақидаги хабар ҳақиқатга тўғри келмайди”, — деди Торобоев.
Расмийнинг таъкидлашича, ҳозирда техник-иқтисодий асосларни (ТES) ишлаб чиқиш бўйича ишлар якунланган.
“Ҳозир уч давлат билан ҳамкорликда қуриладиган темир йўлни молиялаштириш масаласи кўриб чиқилмоқда. Аниқроғи, молиялаштириш моделини танлаш бўйича музокаралар олиб борилмоқда. Бишкекда бу темир йўл қурилиши бўйича уч давлатнинг қўшма идораси очилганини яхши биласиз”, — деди у.
Бакит Торобоев муҳокама қилинаётган лойиҳа Қирғизистон учун келажакда жуда муҳим ва фойдали эканини таъкидлаб, тасдиқланмаган манбаларга таяниб, олиб борилаётган ишларни обрўсизлантирган ёлғон маълумотлар бермасликка чақирди.
Хитой—Қирғизистон–—Ўзбекистон темир йўли қурилиши лойиҳаси бўйича 2022 йил сентябрь ойида Самарқандда бўлиб ўтган ШҲТ саммити доирасида уч давлат вакиллари томонидан келишилган эди. 2023 йилнинг 29 апрелида темир йўл лойиҳасининг техник-иқтисодий асослари тайёрлиги маълум бўлган. 19 майда эса темирйўл қурилиши бўйича уч томонлама ҳужжат имзоланганди.
Изоҳ (0)