Афғонистон темир йўлчилар бошлиғини Туркманистонга жўнатди

Афғонистон темир йўллари департаменти раҳбари Бахту Раҳмон Шараф Туркманистон томонининг таклифига биноан Ашхободга кетди. 

 

Делегация икки томонлама ҳамкорлик, юк ташиш сифатини ошириш ва транспорт масалаларини муҳокама қилади. Икки давлат яқинда Серхетободдан Турғундигача бўлган темир йўл линиясида юк ташиш ҳажмини оширишга келишиб олганди.

Мутахассисларнинг “Дарё”га маълум қилишича, мазкур қуруқлик порти Лапис Лазули (Афғонистон–Туркманистон–Озарбайжон–Грузия–Туркия) халқаро транзит лойиҳасига киритилган. Лойиҳага кўра, темир йўл ва автомобиль йўллари Турғундини Ашхобод билан, кейин эса Каспий денгизидаги Туркманбоши порти билан боғлаши керак. Йўлак Бокугача давом этади, сўнгра Тбилиси орқали Анқара, Поти ва Батумига боради.

Туркманистон Туркманистон–Афғонистон–Тожикистон темир йўли қурилиши орқали Хитой бозорларига, у ердан эса Осиё-Тинч океани минтақасига чиқишни кутмоқда.

Ашхобод аллақачон Афғонистон чегараларига темир йўл линияларини ётқизган ва Афғонистоннинг Акина ва Ҳирот шаҳарларига рельс ётқизиш вазифасини ўз зиммасига олган.

Азиз Бояров