Қозоғистоннинг Туркистон вилоятида 152 километр узунликдаги Дарвоза—Мақтаорол янги темирйўл линияси қурилиши бошланди. Бу ҳақда Қозоғистон бош вазири Алихан Смаилов хабар берди.
Қозоғистон президенти Қосим-Жўмарт Тўқаев топшириғи билан республиканинг транспорт-транзит салоҳиятини янада ривожлантиришга қаратилган йирик инфратузилма лойиҳаси амалга оширилмоқда. Унинг доирасида Қозоғистон-Ўзбекистон давлат чегараси орқали янги назорат-ўтказиш пункти очилади.
2023 йил бошидан буён Қозоғистон ва Ўзбекистон ўртасида юк ташиш ҳажми 25,8 миллион тоннани ташкил этди. Асосий юк оқими бугунги кунда Сариоғоч давлатлараро станцияси орқали ўтади.
Янги темирйўл линиясининг қурилиши мавжуд Сариоғоч—Тошкент участкасидан юкларни янги линияга йўналтириш, Сариоғоч станцияси фаолиятини енгиллаштириш ва бутун Ўзбекистон йўналиши бўйича экспорт ташиш ҳажмини ошириш имконини беради. Бундан ташқари, лойиҳа Туркистон вилоятини республиканинг асосий темирйўл тармоғига улаш орқали унинг ривожланишига ҳисса қўшади.
“Темирйўллар давлатимизнинг иқтисодий ва ижтимоий соҳалари тараққиётини таъминловчи стабил артериядир. Ўтган йили Қозоғистон мустақиллигининг 30 йилидаги максимал юк ташиш ҳажми 245 миллиард тонна-километрни ташкил этди. Бу йил ҳам юқори кўрсаткичлар давом этмоқда”, — деди Алихон Смоилов.
Қозоғистон 2023 йил охирига қадар Ўзбекистон билан юк ташиш ҳажмини қарийб 31 миллион тоннага етказиш режалаштирилган, бу ўтган йилга нисбатан 16 фоизга юқори.
“Ушбу участканинг имкониятларини кенгайтириш, шунингдек, мамлакатимизнинг экспорт ва транзит салоҳиятини ошириш мақсадида биз йирик темирйўл лойиҳаси — Дарвоза – Мақтаорол янги линияси қурилишини бошламоқдамиз”, – деди бош вазир.
Лойиҳа икки босқичга бўлинган. Биринчиси, Сирдарё станциясига чиқадиган Ўзбекистон давлат чегараси бўлган Ердаут-Мақтаорал линиясини қуришни назарда тутади. Иккинчи босқичда шу станцияга чиқиш имконияти бўлган Ўзбекистон давлат чегараси – Еттисой қисми фойдаланишга топширилади.
Жами 152 километр узунликдаги темирйўл қурилади. Лойиҳани амалга ошириш учун 19,7 минг тонна рельс, шунингдек, 280 минг дона темир-бетон шпал ва рельсли маҳкамлагичлар харид қилиш режалаштирилган.
Янги темирйўл линиясининг қурилиши 3400 иш ўрни яратиш имконини беради. Лойиҳада Қозоғистон таркибининг улуши 85 фоизни ташкил этади.
“Қозоғистон темир йўллари” АЖ бошқаруви раиси ўринбосари Канат Алмагамбетовнинг таъкидлашича, Дарвоза – Мақтаорол линияси Туркистон вилоятининг икки чекка тумани – Мақтаорол ва Жетисайни Қозоғистоннинг қолган қисми билан боғлайди.
“Тўққизта станция қурилади. Темирйўл Қозоғистондан ушбу ҳудудларга ва бу ҳудудлардан Қозоғистонга тўғридан-тўғри юк ташиш имконини беради. Чунки энди улар Ўзбекистон чегарасини кесиб ўтишга мажбур. Бу ҳудудларнинг ривожланишига таъсир қилади”, — деди у.
Алмагамбетовнинг сўзларига кўра, Қозоғистоннинг транзит салоҳияти ҳам сезиларли даражада ошади.
“Афғонистон, Эрон, Тожикистон ва Ўзбекистонга кетаётган юклар бу линия орқали тезроқ ўтади. Яна бир таъсир: Сариоғоч-Тошкент участкасида юкланиш пасаяди. Сўнгги йилларда у ерда жуда кўп юк бор эди. Бироқ, уларнинг ҳаммаси ҳам ўз вақтида етказилмайди, чунки у бундай юк оқимига мўлжалланмаган. Охирги икки-уч йил ичида у кескин ошди. Қурилиш ушбу асосий участкадаги тирбандликни бартараф этишга ва йўловчи поездларининг ҳаракатланишига ёрдам беради”, — деди Канат Алмагамбетов.
Шунингдек, у ҳозирда Покистон орқали Ҳиндистонга темирйўл қуриш масаласи муҳокама қилинаётганини айтди. Дарвоза—Мақтаорол линиясининг ишга туширилиши эса Қозоғистоннинг ушбу стратегик йўналишни ривожлантиришга қўшган салмоқли ҳиссаси бўлади.
“Биз юк ташиш ҳажми қўшимча равишда 10-14 миллион тоннага ошишини прогноз қиламиз. Келажакда эса 20-25 миллион тоннагача ошириш мумкин. Тошкент узелини айланиб ўтган ушбу участка ҳар икки йўналишда ҳам анча тез юк ташиш имконини беради”, — дея хулоса қилди Канат Алмагамбетов.
Изоҳ (0)