Амударёда темирйўл линиясининг бир қисми қулаб тушгани юзасидан маълумот берилди 

Қорақалпоғистоннинг Амударё туманида 23 март куни янги қурилаётган темирйўл кўпригининг бир қисми қулаб тушгани ҳақида хабар берилган эди. “Ўзбекистон темир йўллари” АЖ ҳолат юзасидан маълумот берди.

Хабарга кўра, Амударё тумани ҳудудининг шимолий қисмидан ўтувчи Ғузор–Бухоро–Нукус–Бейнеу (А-380) автомобиль йўлининг 717-718-км оралиғида янги темирйўл йўл ўтказгичини қуриш даврида иккита оралиқ балка ҳозирча номаълум сабабларга кўра тушиб кетган.

Қайд этилишича, мазкур ҳолатда ҳеч ким жабр кўрмаган. Бугунги кунда ушбу ҳолатга ойдинлик киритиш мақсадида тегишли мутахассислар ва махсус лаборатория ходимлари сафарбар қилинган.

Ушбу сунъий иншоотнинг қурилиш-монтаж ишлари тугалланмаган, кейинги босқичда йўл ўтказгич темирйўл билан улаш, темирйўлнинг юқори тузилиши, релслар ва шпаллар ётқизилиши керак. Балкаларнинг қулаши натижасида объект структурасининг бошқа тузилмалари ва қурилиш ускуналари шикастланмади. 

“Ушбу йўл ўтказгични Амударё устидан қурилаётган қўшма кўприк билан адаштирмаслик керак. Мазкур йўл ўтказгич Амударё тумани ҳудудидан Хоразм вилояти ҳудудига олиб борувчи янги қурилаётган Шават – Қораузак темирйўл линиясининг бир қисмидир”, дейилади хабарда.