Шанхай ҳамкорлик ташкилотига аъзо давлатларнинг Биринчи транспорт форумида Ўзбекистон транспорт вазири Илҳом Маҳкамов Хитой—Қирғизистон—Ўзбекистон темир йўлини қуриш ишлари қачон бошланишини маълум қилди.
Илҳом Маҳкамовнинг айтишича, Хитойдан Қирғизистон орқали Ўзбекистонга автотранспорт ҳаракати учун шароит яратиб берилган.
“Галдаги асосий ҳаракатимиз Қирғизистон ҳудудида темир йўл қуриш лойиҳаси турибди. Бу бўйича учта мамлакат — Хитой, Қирғизистон, Ўзбекистон биргаликда техник-иқтисодий асосларни ишлаб чиққан.
Бугунги кунда ушбу лойиҳани ким амалга ошириши бўйича музокаралар олиб боряпмиз. Қурилиш ишларини келгуси йилдан бошлашни мақсад қилганмиз”, — деди транспорт вазири.
Унинг қўшимча қилишича, мазкур темир йўл қаерларда қурилиши ва йўналишлари келишилган.
Аввалроқ Хитойнинг Ўзбекистондаги элчихонаси Юй Сзюн Хитой бу лойиҳага жиддий қараши ва ҳозирги кунда доимий равишда келгуси қадамлар борасида келишувлар олиб борилаётганини айтиб ўтганди.
Тўхтаб қолган лойиҳа
Ўзбекистон—Қирғизистон—Хитой темир йўл лойиҳаси кўп йиллардан бери ортга суриб келинади. 2018 йилда мазкур лойиҳа биргаликда тайёрланаётгани айтилган эди.
Жорий йилнинг январь ойида Ўзбекистон ва Қирғизистон етакчилари темир йўл қуриш борасидаги саъй-ҳаракатларни фаоллаштиришга аҳдлашиб олганди.
Изоҳ (0)