“Айрилдим”, “Пари-пари” ва “Қарамадинг” қўшиқлари билан мухлислар кўнглидан жой олган ижодкор Баҳром Назаров бу йил 39 ёшни қаршилади. Унга омад тенгдошларига нисбатан анча кеч кулиб боққан. У темир йўлчи бўлиш ниятида Тошкентга келади ва тақдир тақозоси билан Озодбек Назарбеков билан учрашади. Йўқ тўхтанг, ҳаммасини бир бошидан ҳикоя қилиб берган маъқул.
“Ҳаммаси онам билан гўзал эди”
Баҳром Назаров 1984 йилнинг 4 июнь санасида Андижон вилоятида таваллуд топган. Отаси маданият ходими, онаси эса кутубхоначи эди. Онаси асли Туркистонлик бўлиб, ўқишга келганида андижонлик йигитга кўнгил қўйган.
— Онамнинг барча яқинлари Туркистонда яшарди. Онам ҳамма билан тил топишса-да, барибир Андижонда ўзини ёлғиз ҳис қиларди. “Менинг опам ҳам, синглим ҳам сизларсиз”, деган гапни кўп айтарди. Уч ойлик таътил бошланиши билан дадам поездга билет олиб, барчамизни Туркистонга юборарди. Таътил тугашига уч кун қолганида Андижонга қайтардик. Қўй-қўзиларни ўтлатиб, кун бўйи чўмилиб таътил қандай ўтганини ҳам сезмасдик. Ўйлаб қарасам, болалигимнинг энг гўзал онлари онам билан боғлиқ бўлган экан. Чунки энг яхши хотираларимнинг барида онам бор, — дейди Баҳром Назаров.
“Онам ўлган кун...”
— Онам Тошкентда ўқишимни, кейин ука-сингилларимга ёрдам беришимни орзу қиларди. Ўзи ҳам илмли инсон бўлгани учун Бўз туманидаги хориж тилларига ихтисослаштирилган мактаб интернатига ўқишга берган. “Укаларинг сенга омонат, уларга яхши қарагин”, деган гапни кўп айтарди. Онам ўлгач, бир кундаёқ улғайиб қолгандек бўлганман. Уйимиз ёнидан катта сой ўтарди. Олти ёшлик синглим онамни соғиниб, йиғларди. Ҳар гал уни “Онам сойнинг нарига томонида ўтиб кетди, бир куни қайтади”, деб алдардим. Онамнинг орзусини амалга ошириш учун Тошкентга ўқишга келганман, — дейди хонанда.
“Санъатга умуман қизиқмаганман”
— Кўпчилик болалигидан санъатга қизиқади. Менда ундай бўлмаган. Мен поездларнинг ҳаракатланишига қизиқардим. Шу боис, Тошкентга келиб темир йўллар институтига ҳужжат топширганман. Ўқишга кирганман-у, аммо орадан кўп ўтмай пулсиз Тошкентда яшаш қийин эканлигини тушуниб етганман. Отамга қийинчилик тушмасин деб иш излаганман. Ўшанда “Гулзор” деган ресторанга официант бўлиб ишга кирганман. Бир неча ой ишлаганимдан кейин у ердаги ошпазлардан бири “Кел сенга товуқ пиширишни ўргатаман, йўқлигимда тайёрлаб турасан”, деган. Ўша инсон сабаб ошпазликни ҳам ўрганганман.
Кундузи ўқишга борардим, кейин ишга келардим. Ўша йиллари Озодбек Назарбековнинг “Чанг кўчалар” деган қўшиғи роса ҳит бўлган пайтлар эди. Ошхонада кичкина магнитофонни қўйиб, хиргойи қилиб турсам бир қиз ёнимга келиб, “Бу хонанда акам билан бирга ишлайди”, деган. Кейин билсам у продюсер Илёс Дадабоевнинг синглиси экан. Ресторан у ўқийдиган институтга яқин бўлгани учун акаси туғилган кунини шу ерда нишонлаб берган. Ўшанда ҳаяжонланиб, Илёс акага санъатга қизиқишимни айтганман. У офис манзилини бериб, эртаси куни боришимни айтган, — дейди Баҳром Назаров.
“Официантликни йиғиштир...”
— Айтилган манзилга бориб, илк марта Озодбек Назарбековни кўрганман. Ўшанда Эмраҳ ва Улуғбек Отажоновнинг қўшиқларини ижро этиб берганман. “Ёмон эмас, аммо кўп ишлашинг керак”, деган.
Орадан бир неча кун ўтиб, мен ишлайдиган ресторанга устозим Озодбек Назарбеков хизматга келадиган бўлди. У киши қўшиқларни мароқ билан ижро этаётганида ёнидан бир патнис чойнак билан ўтиб қолганман. Хизмат тугагандан кейин кузатиб ташқарига чиққанимда “Бу ерда нима қилиб юрибсан?”, деган. Официантлик қилишимни айтганимда “Битта ишни қил, агар ниятинг жиддий бўлса офисга ўтгин. Алишер билан бирга юриб, ўз устингда ишлайсан. Официантликни йиғиштир”, деган. Шу куниёқ ишдан кетиб, офисга кўчиб ўтганман.
Яшаш, кийиниш ҳатто еб-ичиш ҳам устозимизнинг зиммасида эди. Биздан ҳеч қандай наф бўлмаса-да, билганини ўргатарди. Хизматларга олиб чиқиб, қўлимизга ишлаган ҳаққимизни берарди. 2003 йилдан бошлаб ҳаётим тубдан ўзгариб кетган, — дейди Баҳром Назаров.
“Бастакорликни ўрганишга ундаган”
— Мусиқий билимим бўлмаса-да, ўша муҳитда яшагандан кейин бир нималар ёзгингиз келар экан. Устозим “Хонанда мусиқа ёзишни билиши керак”, деган гапни кўп айтади. Алишер аввалдан мусиқа ёзиб юрган, мен учун эса бу янгилик эди. “Устоз мен ёзолмайман”, деганимда “Билмайман десанг шундай ўтиб кетасан, ҳеч ким онасидан билиб туғилмаган”, деб жеркиб берганди. Шундан кейин бастакорликни ўрганишга қарор қилганман. Устозимга “Райҳон сенга уйланаман”, “Лайли сендан хафами?” каби қўшиқларни ёзиб берганман. Қўшиқ ҳам айтардим, аммо ҳеч бири омадли чиқмасди. Қўшиқчилар айтганидек “Туғилибоқ ўларди”. Шу боис асосий эътиборимни бастакорликка қаратдим. Кўп хонандаларга қўшиқлар ёзиб бериб тирикчилик қилардим.
Аммо уйланганимдан кейин кўп қийналганман. Ижара уйга пул тўласам, бошқа харажатларга етказолмай қолардим. Фарзандли бўлгач, харажатлар икки ҳисса ошган. 2012 йилда ҳаммасидан кўнглим совиб, санъатдан кетишга қарор қилганман, — дейди хонанда.
“Айрилдим” бисотдаги қўшиқ эди...
— Охири 2013 йили хорижга кетишга қарор қилганман. Швецияга ишга кетиш учун ҳужжат тўплаганман. Аммо визани узоқ вақт кутиш керак экан. “Визангиз 9 ойда чиқади”, деган хабарни олгач, устозимга бу ҳақида айтганман. “Баҳром сабрли боласан-ку, яна бир ҳаракат қилиб кўр”, деган. “Устоз шунча ҳаракат қилдим, уй-жой қилишим керак”, деганимда янги продюсер билан таништирган. “Уч марта эшикни тақиллатиб кўр, эшитгувчи эътибор қаратади”, деганидан кейин продюсер билан ишлашни бошлаганман. Ўшанда тўрт йилдан бери бисотимда турган “Айрилдим” қўшиғини ижро этганман.
Клип Рамазон ойининг илк куни намойиш этилганди. У пайтда тўйлар йўқ, кун бўйи уйда эдим. Рамазон ойи тугаб, тўйларга чиқсам ҳамма танияпти. Худди, машҳур санъаткорни даврага чақиришаётгандек эълон қилишарди. Хуллас, хорижга кетиш муддати келганида Ўзбекистондаги ишларим ҳам кўпайиб кетди, — дейди Баҳром Назаров.
“10 йил темир йўлда ишладим”
— Бошқа тенгдошларимга қараганда, менга анча кеч омад кулиб боқди. Аммо бундан ўксинмайман. Чунки ҳамма нарса вақт соати билан бўлади. 18 ёшимда Озодбек Назарбеков билан танишган бўлсам, 30 ёшимда қўшиғим орқали одамлар оғзига тушдим, — дейди Баҳром Назаров.
Хонанда оиласини кўз-кўз қилишни истамайдиганлар тоифасига киради. Фақатгина интервьюларида устози Озодбек Назарбековнинг аёли топиб берган қизга уйлангани, иккита фарзанди борлиги ва тўйига устози бош-қош бўлгани ҳақида айтиб ўтган.
Изоҳ (0)