Тошкент вилоятининг Чирчиқ шаҳрида яшовчи 32 ёшли фуқаро Мурод Қудабоев спиртли ичимликлар сотувчи дўкон эгаси томонидан калтакланиши оқибатида вафот этди. Зўравон сотувчига нисбатан жиноят иши қўзғатилган. Бу ҳақда “Дарё” сўровига жавобан бош прокуратура ахборот хизмати раҳбари Ҳаёт Шамсутдинов маълум қилди.
Аниқланишича, вилоятнинг Паркент туманида туғилган, аммо айни кунда Чирчиқ шаҳрида яшовчи 38 ёшли тадбиркор Ҳамид Дўстов 2025 йилнинг 5 март куни соат тахминан 19:00 ларда ўзига тегишли савдо дўконини ёпиб, кетаётган пайтда Чирчиқ шаҳрида яшовчи таниши Мурод Қудабоев келиб, унга ичимлик беришини сўраган. Дўкон эгаси унга ишини тамомлаганини, уйига кетаётганини айтса-да, 32 ёшли эркак спиртли ичимлик сотишини талаб қилган. Уларнинг ўртасидаги мулоқот тортишувга айланган.
Жанжал вақтида дўкон эгаси қўли ва оёқлари билан Муроднинг боши ва юз қисмига бир неча маротаба уриб, унга оғир тан жароҳати етказган. Натижада фуқаро Чирчиқ шаҳар тиббиёт бирлашмасига олиб борилган. Бош мия очиқ жароҳати, бош мия лат ейиши, чап чакка тепа суяклари очиқ синиши, бошнинг ўнг қош тепа, чап чакка тепа соҳаси эзилиб йиртилиши каби травматик шок олган эркак шифокорлар кўрсатган ёрдамга қарамай 6 март куни вафот этган.
Ўзини марҳумнинг онаси деб таништирган аёл ижтимоий тармоқда воқеа тафсилотини бошқача талқин қилганди.
Унга кўра, 5 март куни 18:00 га яқин ўғли Ҳамид Дўстов томонидан жисмоний зўравонликка учраган. Мурод ҳушсиз ҳолатда шифохонага олиб кетилган, у комадан чиқмаган.
“Бундан ташқари, ўша куни Ҳамид бир аёлни ҳам урган (аёл тирик, лекин даволанишга муҳтож ҳолатда). Мурод ўша аёлни ҳимоя қилиши ортидан жароҳатлар олган. У 2025 йил 6 март куни соат 21:00 да вафот этди. 7 март куни уни дафн этдик. Муроддан бир ўғил неварамиз қолди”, деган марҳумнинг онаси.
Ҳолат юзасидан Чирчиқ шаҳар ИИБ ҳузуридаги Тергов бўлими томонидан Жиноят кодексининг 104-моддаси 3-қисми “д” банди (қасддан баданга оғир шикаст етказиш жабрланувчининг ўлимига сабаб бўлса) билан жиноят иши қўзғатилиб, дўкон сотувчиси қамоққа олинган.
Қонунчиликка кўра, бундай қилмишни содир этган фуқаро саккиз йилдан ўн йилгача озодликдан маҳрум қилиниши мумкин.
Изоҳ (0)