Тошкент шаҳар Учтепа туманида 6 февраль куни соат 18:30 ларда 4—5 нафар номаълум шахс қора рангли ниқоб ва қўлқоп кийган ҳолда давлат рақами номаълум бўлган, оқ рангли Nexia-1 русумли автомашинада келиб, Nexia-2 русумли автомашина ҳайдовчисига нисбатан куч ишлатган. Бу ҳақда Ўзбекистон ИИВ матбуот хизмати хабар бермоқда.
Қайд этилишича, куч ишлатилган шахс Учтепа туманида яшовчи 1974 йилда туғилган фуқаро бўлиб, унинг қўлларига пластмассадан ясалган кишан тақилиб, бошига қора рангли ниқоб кийдирган ҳолда автомашинада номаълум томонга олиб кетилган. Сўнг унинг белига қўлбола, ясама мослама тақилган ва ундан ўлим билан таҳдид қилган ҳолда 20 минг доллар пул талаб қилинган.
Мазкур ҳолат юзасидан 7 февраль куни Учтепа тумани прокуратураси томонидан Жиноят кодексининг тегишли бандлари бўйича жиноят иши қўзғатилган эди.
ИИВ ҳамда Тошкент шаҳар ИИББ тезкор ходимлари томонидан ҳамкорликда олиб борилган тезкор суриштирув ишлари натижасида мазкур жиноятни содир этганликда гумонланган беш нафар шахс қўлга олинди.
Жиноятда гумонланувчиларнинг бири муқаддам судланган, Тошкент вилояти, Юқори Чирчиқ туманида яшовчи 1968 йилда туғилган шахс экани аниқланиб, жиноий шерикларининг икки нафари Паркент туманида яшовчи – 1969 ва 1978 йилда туғилган, яна икки нафари эса пойтахтнинг Учтепа туманида яшовчи 1984 ва 1991 йилда туғилган шахслар эканлиги аниқланди.
Олиб борилган, тезкор-суриштирув ишлари натижасида юқорида қайд этилган жиноятни улар 1991 йилда туғилган жиноий шерикларининг Nexia русумли автомашинасида содир этганлиги фош этилди.
Ҳозирда мазкур ҳолат юзасидан тезкор-тергов ҳаракатлари давом эттирилмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)