Масжид таҳоратхонасида газ портлаши оқибатида 3 киши ҳалок бўлган, 10 киши турли даражада тан жароҳати олган. Бу ҳақда Фавқулодда вазиятлар вазирлиги маълум қилди.
Таъкидланишича, 31 март куни соат 12:19 да Андижон вилояти, Избоскан тумани “Мирзо Улуғбек” МФЙ, Янгибозор кўчасида жойлашган масжид ҳудудидаги таҳоратхонада газ-ҳаво аралашмасининг чақнаши содир бўлганлиги тўғрисида Андижон вилояти Фавқулодда вазиятлар бошқармасига хабар қилинган.
Зудлик билан айтилган манзилга 2 та қутқарув отряди ва 2 та ёнғин-қутқарув экипажи етиб борган. Ҳодиса натижасида таҳоратхона девор ва том конструкцияларига зарар етган, ёнғин содир бўлмаган.
Чақнаш оқибатида 3 нафар фуқаро (М.А., Ж.А. ва Б.Б.лар). ҳалок бўлган, яна 10 нафар фуқаро (Ғ.Т., А.А., Ҳ.З., И.Р., М.М., И.Ш., К.Қ., У.Б., М.А. ва М.Б.лар) тан жароҳати олиб, шифохонага юборилган.
Воқеа жойига вилоят ҳокими, ФВБ, ИИБ, MG, ССБ, прокуратура ва “Ҳудудгазтаъминот”, туман ФВДҚТ хизматлари куч, воситалари етиб бориб, ҳодиса оқибатлари бартараф этилмоқда.
Ҳодиса содир бўлганлиги хабар қилинганида водийда бўлиб турган бош вазир ўринбосари О.Раматов ҳамда фавқулодда вазиятлар вазири генерал майор Б.Қудратхўжаев Избоскан туманига етиб борган.
Ҳозирда мазкур ҳолат юзасидан дастлабки терговолди суриштирув ишлари олиб борилмоқда.
Изоҳ (0)