Қозоғистоннинг Ақтўбе вилоятидаги К.Нокин қишлоғида эркак ток уриши оқибатида вафот этди. Бу ҳақда Tengrinews хабар берди.
Маълум қилинишича, ҳодиса 31 декабрь куни, Янги йил арафасида юз берган. Фуқаро электр таъминоти йўқлигининг сабабини текшириш учун трансформатор пунктига борган ва ток уришидан вафот этган. Қисқа туташув оқибатида трансформатор пункти ёниб кетган. Марҳум 38 ёшда бўлган.
Ақтўбе вилояти полиция департаментига кўра, трансформатор пунктида жасад топилгани бўйича судгача тергов ҳаракатлари бошланган. Дастлабки ўлим сабаби — электр токи уриши деб тахмин қилинмоқда.
Октябрь ойида ҳам Қозоғистонда электр токи уриши оқибатида ўлим кузатилганди. Энергетика компанияси ходими электр узатиш тармоғида таъмирлаш ишларини амалга ошираётганда ҳалок бўлган. Марҳум 36 ёшда эди.
Изоҳ (0)