Андижон вилоятида 2024 йилнинг 11 ойи мобайнида 630 та йўл-транспорт ҳодисаси содир этилган бўлиб, оқибатда 137 нафар фуқаро вафот этган. Бу ҳақда вилоят ЙҲХБ бошлиғи Рустам Мақсудхўжаевнинг халқ депутатлари вилоят кенгашига қилган ҳисоботида маълум қилинган.
Қайд этилишича, Андижон вилоятида 2024 йилнинг 11 ойи давомида содир бўлган 630 та йўл-транспорт ҳодисаси оқибатида 137 киши вафот этган, 426 нафар фуқаро эса турли даражада тан жароҳати олган.
Таъкидланишича, 2024 йилда йўл-транспорт ҳодисалари ва уларнинг оқибатида жабрланганлар сони 2023 йилга нисбатан камайган. Мисол учун, 2023 йилнинг 11 ойи давомида 681 та йўл-транспорт ҳодисаси содир этилган бўлиб, оқибатда 1139 киши вафот этган, шунингдек, 474 нафар фуқаро турли хил оғир тан жароҳати олиб, шифохонага ётқизилган. Натижада ЙТҲлар 7 фоизга, вафот этганлар 1,4 фоизга, турли тан жароҳатлари олганлар эса 10 фоизга камайган. Шундай бўлса-да, ўтган йилларга нисбатан Хонобод шаҳри, Улуғнор, Асака, Андижон, Қўрғонтепа ва Избоскан туманларида ўлим билан боғлиқ ҳолатлар ошган.
Ушбу йўл транспорт ҳодисалари болалар иштирокида таҳлил қилинганда ўтган 11 ой мобайнида 171 та содир этилган бўлиб, оқибатда болаларнинг 144 таси тан жароҳати олган, 28 нафар болалар вафот этган.
Сентябрь ойида Андижон вилоят Йўл ҳаракати хавфсизлиги бошқармаси собиқ бошлиғи Абдунаби Носиров Андижон шаҳридаги мактаблар олдида қизил чироқда ўтган ва пиёдаларга йўл бермаган ҳайдовчилар ўша мактабларда ўтказилган йиғилишлар вақтида ўқувчи ва ўқитувчилар олдида изза қилингани ҳақида хабар берилган эди.
Йўлларда болалар ўлими
Декабрь ойида Хўжаобод туманида Lacetti автомобилини бошқариб кетаётган ҳайдовчи қатнов қисмининг белгиланган жойидан кесиб ўтаётган 12 ёшли болани уриб юборди. Июль ойида эса Андижон шаҳрида Cobalt ҳайдовчиси 10 ёшли қизчани уриб юбориб, жароҳатланишига сабаб бўлганди.
Шунингдек, ноябрь ойида Жиззах вилоятининг Бахмал туманида Cobalt катта тезликда вояга етмаган икки қизни уриб юборди. Шунингдек, Самарқандда автобус мактаб яқинида йўлни кесиб ўтаётган болани уриб юбориб, унинг ўлимига сабаб бўлганди. Сурхондарёда 1-синф ўқувчиси Nexia уриб юборишидан вафот этганди.
Сентябрда Тошкентда BYD 9 ёшли мактаб ўқувчисини уриб юбориб, унинг ўлимига сабабчи бўлганди. Худди шу каби ҳолат июль ойида Навоий вилояти Хатирчи туманида содир бўлган. Катта тезликда ҳаракатланаётган BYD пиёдалар ўтиш жойидан ўтаётган 9 ёшли қизалоқни босиб кетган. Ўша ойда Самарқандда 7 яшар бола автомобиль уриб кетиши оқибатида вафот этди. Апрелда Жиззахда содир бўлган ЙТҲ оқибатида икки нафар мактаб ўқувчиси ҳалок бўлди.
Болалар иштирокида аянчли ЙТҲлар кўпайгач, жамоат фаоллари йўлларда болалар ўлими учун сиёсий жавобгарлик бўлиши кераклигини айтди.
Изоҳ (0)