Хоразм вилоятида 1000 нафар ортиқ фуқароларни алдаб, сохта трейдерлик фаолияти билан шуғулланиб келган шахс ушланди. Бу ҳақда ИИВ матбуот хизмати хабар берди.
Фуқаро Telegram’даги трейдинг орқали пул кўпайтириш гуруҳига аъзо бўлган фуқаро ўзини Муҳаммад деб таништирган шахс билан мулоқотга киришади.
Фуқаро ёзишмалар давомида пулларини кўпайтириш ҳақидаги гапларга ишониб Муҳаммаднинг картасига 3,3 млн сўм пулни ўтказиб беради. Шундан сўнг Муҳаммад пул ўтказган фуқарони Telegram’даги “қора рўйхат”га киритиб қўяди.
Ўзининг алданганини тушунган фуқаро ИИОга мурожаат қилади. Ўтказилган тезкор тадбирда ўзини Муҳаммад деб таништирган шахс Хоразм вилояти, Урганч туманида яшовчи мутлақо бошқа исм-шарифга эга бўлган фуқаро экани аниқланди.
Гумонланувчининг хонадони кўздан кечирилганда 10 дан ортиқ планшет ва ноутбуклари, 96 та телефон ва 1171 та банк карталари, 343 та SIM карталари борлиги аниқланди.
Ҳолат юзасидан жиноят иши қўзғатилиб, тергов ҳаракатлари олиб борилмоқда.
Қўлга тушаётган сохта трейдерлар
2024 йилнинг октябрь ойи аввалида Тошкентда ўзини трейдер деб таништириб, ўзганинг 7 млн сўмини ўзлаштирган шахс ушланганди. Шунингдек, Наманганда трейдерлик билан шуғулланиши айтиб, ўзганинг 22 млн сўмини ўзлаштирган шахс ушлангани ҳақида хабар берилганди. Бундан ташқари, Қашқадарёда ўзганинг пулини алдов йўли билан ўзлаштирган “трейдер” ушланган эди.
Изоҳ (0)