Хоразм вилоятининг Шовот туманида 2004 йилда туғилган йигит катта бензин цистернасининг ичига тушиб, чиқолмасдан вафот этди. Бу ҳақда Бош прокуратура матбуот хизмати раҳбари Ҳаёт Шамсутдинов “Дарё”га хабар берди.
Маълум қилинишича, Хоразм вилоятининг Шовот тумани тиббиёт бирлашмаси шифокори 27 март куни соат 16:00 ларда ИИБга мурожаат қилиб, тумандаги “Шоҳобод 2022” МЧЖ бензин қуйиш шохобчасининг цистернаси ичида 19-20 ёшлар атрофида бўлган шахс вафот этганлигини билдирган.
Қайд этилишича, 1999 йилда туғилган, ушбу бензин қуйиш шохобчасида ишчи-оператор бўлиб ишловчи фуқаро И.К. 27 март куни соат 13:30 ларда таниши З.Р.нинг уйига бориб, бензин қуйиш шохобчасидаги 10 тонналик цистернанинг ичини тозалаш кераклигини, эвазига иш якунлангандан сўнг хизмат ҳақини беришини айтган.
Шундан сўнг З.Р. вақти йўқлигини ва фарзанди М.О. билан биргаликда цистернани ичини тозалашини айтган. Фуқаро И.К. 2004 йилда туғилган М.О. билан биргаликда соат 15:30 ларда бензин қуйиш шохобчанинг цистернасини тозалашни бошлаган.
Иш давомида М.О. цистернанинг ичига нарвон қўйиб, қўлида белкурак билан тушиб тозалаётган вақтда цистерна ичидаги ёқилғи қолдиқлари ҳидидан заҳарланиб, ҳушидан кетган.
Бу ҳолатни И.К. кўриб, унга ёрдам бериш учун цистерна ичига тушиб, М.О.ни кўтариб чиқаётган вақтида ўзи ҳам ҳушини йўқотишни бошлаган. Шу вақтда И.К.нинг укаси О.О. кийимидан ушлаб тортиб олган, М.О. эса цистерна ичида ҳушсиз қолиб кетиб, вафот этган.
Маълумот учун, З.Р. ва фарзанди М.О. 2024 йил давомида ушбу бензин қуйиш шохобчасининг цистерналарини 4 марта тозалаб берган ва эвазига ҳар бири учун 100-150 минг сўм олган.
Изоҳ (0)