АҚШ президенти Дональд Трамп хориждан олиб кириладиган барча товарларга божлар жорий этилишини эълон қилди. Бу ҳақда у Оқ уйда бўлиб ўтган матбуот анжуманида маълум қилди.
Трамп божхона тўловлари жорий этиладиган 185 давлат рўйхатини келтирди. Базавий тариф 10 фоизни ташкил этади, Ўзбекистон товарларига ҳам шунча миқдорда бож солинмоқда. Бироқ кўплаб давлатлар учун тарифлар юқорироқ бўлиб чиқди.
Хусусан, Хитойдан келадиган товарларга божлар 34 фоизни, Европа иттифоқи мамлакатларидан 20 фоизни, Швейцариядан 31 фоизни, Исроилдан 17 фоизни, Қозоғистондан 27 фоизни ташкил этади. Вьетнам (46 фоиз), Камбожа (49 фоиз), Лаос (48 фоиз) энг юқори тарифларга эга бўлди.
Рўйхатда Россия тилга олинмаган, Мексика, Эрон, Канада ва Беларусь ҳам йўқ. Вашингтон Украина товарларига нисбатан 10 фоизлик савдо божини жорий этишга қарор қилди.
Молдова (31 фоиз) ва Қозоғистондан ташқари, постсовет ҳудудининг аксарият мамлакатлари учун 10 фоизлик бож миқдори жорий этилган. Арманистон, Озарбайжон, Грузия, Ўзбекистон, Туркманистон, Қирғизистон, Тожикистон шулар жумласидандир.
Трамп енгил автомобиллар, юк машиналари ва уларнинг эҳтиёт қисмлари импортига 25 фоизлик божлар жорий этиш тўғрисидаги фармойишни имзолади.
Оқ уй раҳбари божлар киритилишини “иқтисодий мустақиллик декларацияси” деб атади ва 2 апрель “Америка саноатининг тикланиш куни” сифатида тарихга киришини айтди. У тарифларни олиб ташлашни сўраган давлат раҳбарларига божларни бекор қилишни маслаҳат бермоқда.
Трампнинг таъкидлашича, “АҚШнинг дўстлари ва душманлари” ўнлаб йиллар давомида Америка иқтисодиётини талон-торож қилиб келган, бироқ ўзаро божлар жорий этилиши билан бунга “нуқта қўйилган”. Унинг сўзларига кўра, бу АҚШ иқтисодиёти учун “олтин аср”га олиб келади, “иш ўринлари ва фабрикалар мамлакатга қайтади”.
АҚШ президенти мазкур божлардан тушган “триллионлаб доллар” солиқларни камайтириши ва давлат қарзини тўлашга йўналтирилишини айтди.
Кўп йиллар мобайнида Американинг меҳнаткаш фуқаролари четда қолиб кетишга мажбур бўлди, бошқа мамлакатлар эса бой ва қудратли бўлиб борди — кўп жиҳатдан бизнинг ҳисобимизга. Энди эса гуллаб-яшнаш навбати бизга келди ва шу тарзда солиқларни камайтириш ҳамда давлат қарзини узиш учун триллионлаб долларларни сарфлаш имконияти туғилди, дея таъкидлади Америка президенти.
Маълум қилинишича, 10 фоизлик базавий бож 5 апрелдан, бир қатор давлатлар учун “ўзаро” тарифлар эса 9 апрелдан амал қила бошлайди. Трамп божлар миқдорини ўзгартириши мумкинлигидан огоҳлантирди. Товарларига божлар солинган давлатлар рўйхати:
Изоҳ (0)