Покистонда қуролланган шахслар автобусдаги камида тўққизта йўловчини ўғирлаб, қатл этишди. Бу ҳақда маҳаллий Тhe Express Tribune нашри хабар берди.
“Левис” ҳарбий тузилмаси вакилининг маълум қилишича, ҳодиса Зҳоб туманида юз берган. Жиноятчилар икки йўловчи автобусини тўхтатиб, йўловчиларнинг шахсини тасдиқловчи ҳужжатларини текширган ва тўққиз кишини олиб кетган. Кейинчалик уларнинг ўлган жасадлари тоғлардан топилган.
Ҳужум учун жавобгарликни ҳозирча ҳеч ким ўз зиммасига олмади.
Полиция зобити Ясин Мандохаилнинг айтишича, марҳумларнинг жасадлари суд-тиббий экспертизадан ўтказиш учун Рахни шифохонасига етказилмоқда.
Балужистон ҳукумати расмий вакили Шаҳид Ринднинг сўзларига кўра, хавфсизлик кучлари воқеага дарҳол муносабат билдирган, бироқ ҳужумчилар қоронғиликдан фойдаланиб қочишга улгурган. Минтақада кенг кўламли қидирув ишлари олиб борилмоқда.
Покистоннинг энг йирик, аммо энг ривожланмаган вилояти бўлган Балужистон кўп йиллик можаролар ҳудудига айланиб қолган. Жиноятчи гуруҳлар хавфсизлик кучларига, давлат тузилмалари вакилларига ва бошқа вилоятлардан, айниқса Панжобдан келганларга мунтазам равишда ҳужумлар уюштирмоқда.
Бундан аввал Покистоннинг шимоли-ғарбида террорчи томонидан амалга оширилган портлаш натижасида камида 16 киши ҳаётдан кўз юмганди.
Изоҳ (0)