Германияда шифокор 14 июль куни 15 нафар беморни ўлдирганликда айбланиб, суд қилинди. Бу ҳақда Arab News хабар берди.
Немис оммавий ахборот воситалари томонидан Йоханнес М. деб юритилаётган 40 ёшли шифокор 2021 йил сентябридан 2024 йил июлигача Берлиндаги шифохоналардан бирида ишлаган. У фаолияти давомида 12 нафар аёл ва 3 нафар эркакни ўлдирганликда айбланмоқда.
Таъкидланишича, шифокор 25 дан 94 ёшгача бўлган жабрланувчиларга уларнинг хабари ёки розилигисиз оғриқсизлантирувчи ва мушакларни бўшаштирувчи (релаксант) дорилар юборган. Релаксант нафас олиш мушакларини фалажлаб, нафаснинг тўхташига ва бир неча дақиқа ичида ўлимга олиб келган. Шу тариқа, Йоханнес ўзининг жиноятларини яшириш мақсадида беморларнинг уйларига ўт қўйган.
“Айбланувчи тиббий ёрдам кўрсатиш баҳонасида беморларнинг уйига борган. Унинг ташрифлардан мақсади фақатгина ўлдириш бўлган. У беморларининг ишончини суиистеъмол қилган ва инсонлар ҳаётига беписандлик билан қараган. Йоханнес ўзини ҳаёт ва ўлим ҳукмдори сифатида тутган”, деди прокурор Филипп Мейхофер судда.
Шифокорнинг ҳамкасбларидан бири 2024 йилнинг июнь ойида Йоханнесдан шубҳаланишни бошлаган. Чунки унинг кўплаб беморлари айнан ёнғинларда ҳалок бўлаётган эди. Йоханнес август ойида ҳибсга олинган, прокурорлар дастлаб уни 4 та ўлимда айблаган. Аммо кейинги терговлар бошқа кўплаб шубҳали ҳолатларни очиб берган. Апрель ойида прокурорлар Йоханнесни 15 та қотиллик бўйича жиноий жавобгарликка тортган.
Прокурорларнинг таъкидлашича, яна 96 та иш ҳали ҳам тергов қилинмоқда, жумладан, шифокорнинг қайнонаси ўлими ҳам текширилмоқда. Таъкидланишича, аёл саратон касаллигидан азият чеккан. Йоханнес ва унинг рафиқаси 2024 йил бошида аёлни кўриш учун Польшага борганида у сирли равишда вафот этганди.
Изоҳ (0)